შინაგან საქმეთა სამინისტროს გათავისუფლებული ცხრა თანამშრომლის მხრიდან ინფორმაციის გაცემა კერძო პირებზე და ადვოკატებზე ხდებოდა.

ამის შესახებ ტელეკომპანია „იმედის“ ეთერში შინაგან საქმეთა მინისტრის მოადგილემ არჩილ თალაკვაძემ განაცხადა.

„ეს ცხრა შემთხვევაც არის ის მაგალითები, როდესაც კანონმდებლობის დარღვევით თანამშრომლები, რომლებსაც ჰქონდათ დაშვება სამინისტროს ბაზებთან, პირადი ინტერესების გამო გასცემდნენ ამ ინფორმაციას. ყველა შემთხვევაში ჩვენ მოვახდინეთ სათანადო რეაგირება. ამ ცხრა შემთხვევაში არის ნაწილი, როდესაც ისინი ინფორმაციას გასცემდნენ კერძო პირებზე, ასევე ადვოკატებზე... რაც შეეხება პოლიტიკურ პარტიებზე ინფორმაციის გაცემას, ეს არის მხოლოდ ერთი შემთხვევა, რომელზეც დღეს ვისაუბრეთ“, - განაცხადა თალაკვაძემ.

შეგახსენებთ, შინაგან საქმეთა სამინისტრომ გივი თარგამაძისთვის ინფორმაციის მიწოდების გამო შსს-ს თანამშრომელი რუსლან ბაზიაშვილი გაათავისუფლა. ასევე გენერალური ინსპექციის მიერ, შსს-ს ბაზაში დაცული ინფორმაციის გაცემის ფაქტზე, სამინისტროს რიგებიდან 9 თანამშრომელია დათხოვნილი.