შინაგან საქმეთა მინისტრის მოადგილე არჩილ თალაკვაძე არასწორს უწოდებს გივი თარგამაძის ინფორმაციას, რომ ის პოლიციელისგან ინფორმაციას იღებდა, როგორც ნდობის ჯგუფის წევრი.

ამის შესახებ თალაკვაძემ ტელეკომპანია „იმედის“ ეთერში განაცხადა.

მისი თქმით, რუსლან ბაზიაშვილი თარგამაძეს ინფორმაციას დეპუტატის პირადი ინტერესის საფუძველზე აწვდიდა.

„ბატონმა თარგამაძემ დაადასტურა, რომ შინაგან საქმეთა სამინისტროს გენერალურმა ინსპექციამ პროფესიონალურად იმუშავა, მაგრამ მან შეცდომა დაუშვა მეორე ნაწილში, როდესაც თქვა, რომ ამ ინფორმაციას იღებდა როგორც ნდობის ჯგუფის წევრი. თარგამაძემ ამ შემთხვევაში საზოგადოების შეცდომაში შეყვანა სცადა. მან იცის, რომ ნდობის ჯგუფს ინფორმაციის ასეთი გზით მიღების უფლება არ აქვს და ინფორმაციის მოპოვების პროცესი გაწერილია კანონმდებლობაში. ინფორმაციის მოთხოვნის უფლება მხოლოდ ნდობის ჯგუფის თავმჯდომარეს აქვს. ამ შემთხვევაში გათავისუფლებული პოლიციელი თანამშრომლობდა არა ნდობის ჯგუფთან, არამედ პირდაპირ გივი თარგამაძესთან, რომელსაც პირადი ინტერესის გამო აწვდიდა ინფორმაციას, რომელსაც ბატონი თარგამაძე პარტიული ინტერესებისთვის იყენებდა“, - განაცხადა თალაკვაძემ.

შეგახსენებთ, შინაგან საქმეთა სამინისტრომ გივი თარგამაძისთვის ინფორმაციის მიწოდების გამო შსს-ს თანამშრომელი რუსლან ბაზიაშვილი გაათავისუფლა.

მოგვიანებით, გივი თარგამაძემ განაცხადა, რომ შსს-დან გათავისუფლებული თანამშრომელი მას ინფორმაციებს აწვდიდა, როგორც დეპუტატსა და ნდობის ჯგუფის წევრს.