პატრულ-ინსპექტორ არჩილ დავითულიანს და ნიკა ალიხანაშვილს, რომლებიც 26 იანვარს, ოქროყანის გზაზე რამდენიმე მოქალაქესთან მომხდარ ინციდენტში მონაწილეობდნენ, გამოძიების დასრულებამდე უფლებამოსილება შეუჩერდათ.

ამის შესახებ შსს-ში გამართულ ბრიფინგზე გახდა ცნობილი.

გენერალური ინსპექციის დასკვნის საფუძველზე, რუსლან ბაზიაშვილი სამსახურიდან დათხოვნილია. ასევე გვსურს გაცნობოთ, რომ პროკურატურამ დაიწყო გამოძიება ქალაქ თბილისში, ოქროყანის გზაზე, 2015 წლის 26 იანვარს პატრულ-ინსპექტორებსა და მოქალაქეებს შორის მომხდარ ინციდენტთან დაკავშირებით.

ვინაიდან გამოძიების პროცესში გამოიკვეთა საპატრულო პოლიციის თანამშრომლების მხრიდან სამსახურებრივი უფლებამოსილების გადამეტების და განზრახ უკანონო დაკავების შესაძლო ფაქტები, სისხლის სამართლის საქმის მასალებზე დაყრდნობით, შსს-ს გენერალურმა ინსპექციამ მოკვლევა ჩაატარა. გენერალური ინსპექციის დასკვნის საფუძველზე, პატრულ-ინსპექტორ არჩილ დავითულიანს და ნიკა ალიხანაშვილს გამოძიების დასრულებამდე უფლებამოსილება შეუჩერდათ. გენერალური ინსპექციის მიერ, შსს-ს ბაზაში დაცული ინფორმაციის გაცემის ფაქტზე, სამინისტროს რიგებიდან 9 თანამშრომელია დათხოვნილი. შინაგან საქმეთა სამინისტრო მოუწოდებს პოლიტიკურ პარტიებს, თავი შეიკავონ მსგავსი მეთოდებით პოლიციის დისკრედიტაციის მცდელობებისგან. ასევე, პოლიციის თანამშრომლებს შევახსენებთ „პოლიციის შესახებ“ კანონს, რომლის თანახმად, პოლიციელს უფლება არ აქვს თავისი სამსახურებრივი მდგომარეობა გამოიყენოს რომელიმე პოლიტიკური სუბიექტის პარტიული ინტერესებისთვის. „პოლიციის ეთიკის კოდექსის“ მიხედვით, პოლიციელმა ბოროტად არ უნდა ისარგებლოს სამსახურებრივი ინფორმაციით და პერსონალური მონაცემებით საკუთარი ან/და ახლობელ პირთა კერძო ინტერესების დაკმაყოფილებისთვის. პოლიციის თანამშრომლების მხრიდან ნებისმიერი მსგავსი გადაცდომის შემთხვევაში, გამოყენებული იქნება კანონით განსაზღვრული სასჯელის მკაცრი ზომები", - ნათქვამია შსს-ს განცხადებაში.

შეგახსენებთ, ოქროყანაში მომხდარტ ინციდენტზე ინფორმაცია რამდენმე დღის წინ „ნაციონალურმა მოძრაობამ“ გაავრცელა. მათ მიერ გავრცელებულ ვიდეოში ჩანდა, რომ საპატრულო პოლიციის თანამშრომლებს მოქალაქე შეურაცხყოფას აყენებდა.

მოგვიანებით, პროკურატურამ გაავრცელა ინფორმაცია, რომ შემთხვევის დროს პატრულის თანამშრომლებმა უკანონოდ განახორციელეს მოქალაქეების დაკავება.