,,როცა ვამბობთ, რომ ღმერთი განაგებს ბედნიერებას, უნდა გვახსოვდეს, რომ ღმერთი წინასწარ ხედავს ჩვენს ცხოვრებას. ამიტომ უნდა ვაკეთოთ სიკეთე და ისეთი საქმე, რომელიც საჭიროა არა მარტო ჩვენთვის, არამედ ერისთვის. ხშირია, როდესაც ადამიანს ერი ავიწყდება, ფიქრობს მხოლოდ საკუთარ სკამზე და თანამდებობაზე და საკუთარ კეთილდღეობას უფრო მაღლა აყენებს და ანაცვალებს მას ერის კეთილდღეობას. ამიტომ, ჩვენ უნდა ვიყოთ დაკვირვებული. არსებობს ფართო და ვიწრო გზა, ვისაც უნდა იაროს ფართო გზით, ის ვერ მივა სასუფეველში. ღმერთმა მოგვცეს კეთილგონიერება, რომ გავარჩიოთ სად არის სიკეთე და სად ბოროტება’’, - ბრძანა უწმინდესმა.

როგორც პატრიარქმა აღნიშნა, ადამიანი უნდა ხედავდეს, სად არის კეთილი და ბოროტი, და შესაბამისად სად არის საფრთხე. უწმინდესის თქმით, ბედნიერია ის ადამიანი, ვინც მორწმუნეა, ვინც ცხოვრობს მომავლისა და ღვთის იმედით და ადმიანებს ენდობა.

,,ხშირად ადამიანს გააჩნია მძიმე ჯვარი და ღვთის წყალობით ადვილად ატარებს თავის ჯვარს. მეცნიერები ამბობენ, რომ სამი რამ აფუჭებს და რყვნის ადამიანს: დიდება, ანუ დიდი თანამდებობა, სიმდიდრე და სილამაზე. ჯავახიშვილი ამბობს, რომ თამარ მეფეს სამივე ჰქონდა და ის გახდა წმინდანი. ეს წუთისოფელი ცდილობს დაიჭიროს ადამიანი ფულით, თანამდებობით და სხვა საშუალებებით, მაგრამ ადამიანი უნდა ხედავდეს, სად არის კეთილი და სად ბოროტი, სად არის საფრთხე. მე არაერთხელ მითქვამს, რომ იყო დიდი ფილოსოფოსი, რომლის საფლავზეც წერია: ,,წუთისოფელი ცდილობდა დავეჭირე მე, მაგრამ ვერ დამიჭერა’’. ეს იშვიათ ადამიანს შეუძლია თქვას’’, - ბრძანა უწმინდესმა.