პრეზიდენტმა, ვლადიმერ პუტინმა აღიარა, რომ რუსეთის შეიარაღებული ძალები ყირიმის ტერიტორიაზე იმყოფებოდნენ და აგრესიული ქმედებებისთვისაც მზად იყვნენ.

ამის შესახებ, აშშ-ის სახელმწიფო მდივნის პრესსპიკერმა, ჯენ პსაკიმ ფილმის - „ყირიმი. გზა სამშობლოსკენ“ კომენტირებისას განაცხადა.

„ერთი წლის წინ, პუტინმა მსოფლიოს განუცხადა, რომ ყირიმის კონფლიქტში რუსეთის შეიარაღებული ძალები არ მოქმედებდნენ. ახლა ეს ფაქტი აღიარა და ყველაფერში გამოტყდა. რუსული ჯარები ყირიმის კონფლიქტში ჩაერივნენ. ეს, თავად პუტინის სიტყვებია. მე ნამდვილად მჯერა, რომ ისინი უფრო მეტი აგრესიული ქმედებებისთვისაც მზად იყვნენ“ - განაცხადა პრესსპიკერმა.

მისივე თქმით, სანამ ყირიმის ნახევარკუნძული უკრაინას არ დაუბრუნდება, რუსეთის წინააღმდეგ დაწესებული სანქციები გაგრძელდება.

პსაკის განცხადებით, რუსეთმა ყირიმის ანექსიის შემდეგ, თავისი ქმედების გასამართლებლად ნახევარკუნძლზე უკანონო რეფერენდუმი ჩაატარა, რითაც უკრაინის კანონმდებლობა და სუვერენიტეტი დაარღვია.

ჯენ პსაკი აღნიშნავს, რომ ყირიმის საკითხთან დაკავშირებით აშშ-ის მტკიცე პოზიცია გააჩნია, არ ცნობს ყირიმის უკანონო ანექსიას და მხარს უჭერს უკრაინის სუვერენიტეტსა და ტერიტორიულ მთლიანობას .

ხატია ლაღიძე