რაგბის მატჩზე ინციდენტის მონაწილე ონისე გერგედავა დროებითი მოთავსების იზოლატორშია გადაყვანილი

სამართალი - 00:08, 15 Mar, 2015

3089

ინციდენტს ჰქონდა ადგილი საქართველო-რუსეთის სარაგბო მატჩზე. პოლიციასა და გულშემატკივარს შორის დაპირპისრებაზე ისაუბრა ასევე "ნაციონალური მოძრაობის" წევრმა მიხეილ მაჭავარიანმა ტელეკომპანია "რუსთავი 2"-ის ეთერში.

"რაგბიზე მისული იყო გულშემატკივრების ჯგუფი, რომელთაც უნდოდათ დაეფიქსირებინათ მხარდაჭერა უკრაინის მიმართ. კრიმინალურმა პოლიციამ ჩაატარა სპეცოპერაცია და უკვე 17:00 საათიდან ერთ-ერთი ადამიანის ონისე გერგედავას გზა-კვალი არ ვიცით. ეს ადამიანი გატაცებულია. ამ ოპერაციას ხელმძღვანელობდა ბესელია", - განაცხადა მაჭავარიანმა.

მისივე თქმით, ბესელია ახალი ხელისუფლების პირობებში დააწინაურეს. იგი იყო სამეგრელოს პოლიციის უფროსი. "ახლა, როგორც ჩანს, ამ კაცს პოლიტიკური პოლიციის როლი ჩააბარეს", - აღნიშნა მაჭავარიანმა.

რაც შეეხება ონისე გერგედავას, როგორც "ნიუპოსტს" შსს-ში განუცხადეს, ონისე გერდეგავა ადმინისტრაციულ სამართალდარღვევათა კოდექსის 173-ე (სამართალდამცავ ორგანოთა მუშაკების კანონიერი განკარგულებისადმი ან მოთხოვნისადმი დაუმორჩილებლობა) და 166-ე (წვრილმანი ხულიგნობის) მუხლების საფუძველზეა დაკავებული.

უწყების ინფორმაციით, ონისე გერგედავა დროებითი მოთავსების იზოლატორშია გადაყვანილი.