ვანო მერაბიშვილმა ბრალის დაზუსტების დოკუმენტს ხელი არ მოაწერა

სამართალი - 14:55, 14 Mar, 2015

1174

7 ნოემბრის საქმეზე ვანო მერაბიშვილს ბრალი დაუზუსტდა. როგორც პროკურატურის განცხადებაშია აღნიშნული, ივანე მერაბიშვილის მიმართ გამოტანილი დადგენილებით დაზუსტდა ბრალის ფაქტობრივი გარემოებები, ხოლო კვალიფიკაცია დარჩა უცვლელი - საქართველოს სისხლის სამართლის კოდექსის 333-ე მუხლის მესამე ნაწილის „ბ“ და „გ“ ქვეპუნქტები. (ტელეკომპანია „იმედის“, 2007 წლის ნოემბრისა და მთაწმინდის პარკში შეჭრის ეპიზოდები) - სასჯელის სახით ითვალისწინებს თავისუფლების აღკვეთას ვადით 5-დან 8 წლამდე.

მატროსოვის ციხეში იმყოფებოდა მერაბიშვილის ადვოკატი გოგიტა გაბაიძე. როგორც გოგიტა გაბაიძემ განმარტა, ვანო მერაბიშვილისთვის ბრალის დამძიმება არ მომხდარა.

"ამ შემთხვევაში ვანო მერაბიშვილის მიმართ წარდგენილი ბრალდება დარჩა, რაც იყო სისხლის სამართლის კოდექსის 333-ე მუხლის მე-3 ნაწილი, ანუ უფლებამოსილების გადამეტება. უბრალოდ, მასთან მიმართებაში ბრალის ფორმულირება დაზუსტდა", - განაცხადა გაბაიძემ.

გოგიტა გაბაიძის თქმით, ბრალდების ეპიზოდი ეხება 2006-2007 წლებს, ტელეკომპანია "იმედს", ბადრი პატარკაციშვილთან დაკავშირებულ დეტალებს და ა. შ.

გაბაიძის განცხადებით, ვანო მერაბიშვილმა ბრალის დაზუსტების დოკუმენტს ხელი არ მოაწერა.