ჯონ მაკკეინი გერმანიის საგარეო საქმეთა მინისტრს აკრიტიკებს.

ამერიკელი რესპუბლიკელი სენატორი, უკრაინის საკითხთან მიმართებით გერმანიის საგარეო საქმეთა მინისტრის ფრანკ-ვალტერ შტაინმაიერის პოზიციამ გააღიზიანა და მწვავედ გააკრიტიკა.

მაკკეინის განცხადებით, გერმანიის საგარეო საქმეთა მინისტრი, თავის მთავრობასთან ერთად თავს არიდებს პუტინის ქმედებების შეზღუდვას, მაშინ როცა ის უკრაინელებს ანადგურებს.

მაკკეინის რეაქცია, შტაინმაიერის მიერ ირანის ხელისუფლებისათვის წერილის გაგზავნის კომენტირებას მოჰყვა. შეგახსენებთ, 47-მა ამერიკელმა სენატორმა, მათ შორის ჯონ მაკკეინმა ირანის ხელისუფლებას წერილი გაუგზავნა, რომელშიც ნათქვამია იყო, რომ ბირთვულ სფეროში თეირანთან ნებისმიერი გარიგება, კონგრესის მიერ დაუმტკიცებლად, ბარაკ ობამას პრეზიდენტობის ვადის ამოუწურვისთანავე გაუქმდებოდა.

შტაინმაიერმა, წერილთან დაკავშირებით შეშფოთება გამოთქვა და აღნიშნა, რომ რესპუბლიკელების ეს ქმედება, შესაძლოა ძირს უთხრის „ექვსეულის“ სანდოობას, რომლებიც თეირანთან მოლაპარაკებებში საერთაშორისო შუამავლებს წარმოადგენენ.

„მოლაპარაკებები საკმაოდ რთულია, ამიტომ დამატებითი გაუკვევლობის ფაქტორები არ გვჭირდება“ - განაცხადა შტაინმაიერმა.

ამასთანავე, გერმანიის საგარეო საქმეთა მინისტრმა, კიდევ ერთხელ დააფიქსირა ბერლინის ნეგატიური დამოკიდებულება უკრაინისთვის ლეტალური იარაღის გადაცემასთან დაკავშირებით. მისი თქმით, ზოგიერთი ამერიკელი რესპუბლიკელი სენატორების იდეა, უკრაინა იარაღით მოამარაგონ, იმდენად სახიფათოა, რომ რეგიონში სიტუაციის ესკალაციასა და კონფლიქტის ახალ ფაზაში გადასვლას გამოიწვევს. შეგახსენებთ, ჯონ მაკკეინი უკრაინისთვის თავდაცვითი იარაღის გადაცემის ინიციატივით არაერთხელ გამოსულა. ამასთან დაკავშირებით, მან წერილი ბარაკ ობამასაც მისწერა.

ხატია ლაღიძე