რუსული მედია, ვლადიმერ პუტინის ავადმყოფობაზე წერს.

გავრცელებული ინფორმაციით, რუსეთის პრეზიდენტს ჯანმრთელობამ უღალატა და ავად არის.

პუტინის ავადმყოფობაზე აჟიოტაჟი, გუშინ ჩაშლილმა შეხვედრებმა გამოიწვია.

რუსეთის პრეზიდენტმა, გუშინ ასტანაში დაგეგმილი ვიზიტი გააუქმა, სადაც ყაზახეთისა და ბელორუსიის ლიდერებს უნდა შეხვედროდა.

ჩაიშალა, რუსეთსა და ე.წ. სამხრეთ ოსეთის რესპუბლიკას შორის თანამშრომლობის ხელშეკრულების გაფორმებაც, რომელიც გუშინ უნდა შემდგარიყო და მოსკოვში ხელმოწერის ცერემონიაზე ჩასულ ცხინვალის დელეგაციას, შეხვედრის ჩაშლის შესახებ რამდენიმე საათით ადრე აცნობეს.

პუტინის პრესსამსახურს ჩაშლილი შეხვედრების შესახებ ოფიციალური განცხადება არ გაუკეთებია.

მცირედი კომენტარით შემოიფარგლა რუსეთის პრეზიდენტის პრესმდივი დიმიტრი პესკოვი.

პესკოვმა, პუტინის ავადმყოფობის შესახებ გავრცელებული ცნობები უარყო და განაცხადა, რომ პრეზიდენტი თავს აბსოლუტურად კარგად გრძნობს, გადადებული შეხვედრების შესახებ კი განცხადება არ გაუკეთებია.

აღსანიშნავია, რომ ვლადიმერ პუტინი მედიის წინაშე ბოლოს 8 მარტს გამოჩნდა. ქალთა დღეს პრეზიდენტმა ხელოვნების, მეცნიერებისა და სპორტის წარმომადგენელ ქალებს, კრემლში უმასპინძლა. მას შემდეგ, ჟურნალისტებთან არ გამოჩენილა.

სავარაუდოდ, ეჭვების გასაქარწყლებლად, კრემლმა პუტინის ფოტო გაავრცელა და განაცახდა, რომ გუშინ რუსეთის პრეზიდენტს ოფიციალური შეხვედრა ჰქონდა.

გამოცემა „როიტერი“ კი სანდო წყაროზე დაყრდნობით ირწმუნება, რომ ვლადიმერ პუტინის ჯანმრთელობის მდგომარეობა საკმაოდ მძიმეა.

ხატია ლაღიძე