უკრაინის პრეზიდენტმა, პეტრო პოროშენკომ რადას, 2015 წლისთვის მრავალეროვანი სწავლების ჩასატარებლად უკრაინის ტერიტორიაზე სხვა სახელმწიფოების შეიარაღებული ძალების მიღება დაშვება შესთავაზა.

შესაბამისი კანონპროექტი რადაში 6 მარტს დარეგისტრირდა.

შეგახსენებთ, 20 თებერვალს უკრაინის გენერალური შტაბის სპიკერმა, ვლადისლავ სელეზნიოვმა, უშიშროების საბჭოს მიერ დამტკიცებული სამხედრო სწავლების გრაფიკი გამოაქვეყნა, რომლის მიხედვითაც 11 საერთო წვრთნიდან, 4 უკრაინის ტერიტორიაზე ჩატარდება.

„უკრაინულ-ამერიკული სამხედრო სწავლებები "Sea Breeze 2015" შავი ზღვის აკვატორიაში, პოლიგონებზე, აეროდრომებსა და პორტებში 25 დღის განმავლობაში გაიმართება, რომელშიც მონაწილეობას 2.500 სამხედრო, 9 ხომალდი, 8 ვერტმფრენი და 2 წყალქვეშა ხომალდი მიიღებს. ნატო-სგან „პარტნიორობა მშვიდობისთვის“ ფარგლებში, წვრთნებში მონაწილეობის მისაღებად 500-მდე ჯარისკაცი, 6 გემი, 3 წყალქვეშა ხომალდი, 6 თვითმფრინავი და ვერტმფრენი მიიღებს"- განაცხადა სელეზნიოვმა.

ამავდროულად, კიდევ ერთი ამერიკულ-უკრაინული სამხედრო წვრთნის ჩატარება, ლვოვშიც იგეგმება.

რაც შეეხება უკრაინულ-პოლონურ სწავლებებს, მასში მონაწილეობას 350-მდე სამხედრო პირი, 10 თვითმფრინავი და ერთი ვერტმფრენი მიიღებს. წვრთნები 14 დღის განმავლობაში გაგრძელდება.

უკრაინის ტერიტორიაზე მრავალეროვანი სამხედრო წვრთნის ჩატარებისთვის უმაღლესი რადას თანხმობაა აუცილებელი.

ხატია ლაღიძე