ქუთაისის მეორე საპყრობილეში პატიმრები შიმშილობენ. ინფორმაციას დეპუტატ აკაკი ბობოხიძის ძმის ადვოკატი რობიზონ ხურცილავა ავრცელებს.

მისი განმარტებით, მოშიმშილეთა შორის არიან ბობოხიძეც და ხონის ყოფილი გამგებელი ზურაბ ჯიბუხაია.

„ლევან ბობოხიძე საპყრობილეში უკანონოდ იმყოფება. გადაწყვეტილება გასაჩივრებული იქნა ქუთაისის სააპელაციო სასამართლოში, სადაც არაერთხელ მოხდა პროცესის გადადება, რასაც მოჰყვა ლევან ბობოხიძის გაღიზიანება და გუშინ, სასამართლო პროცესზე განაცხადა, რომ შიმშილობას იწყებდა. მასთან ერთად შიმშილობს ზურაბ ჯიბუხაიაც და მათ სოლიდარობას უცხადებენ საკანში მყოფი პატიმრები“, - განაცხადა ხურცილავამ.

სასაჯელაღსრულების სამინისტროს ინფორმაციით კი მხოლოდ ერთი პატიმარი, ლევან ბობოხიძე შიმშილობს.