დისკრიმინაციის აკრძალვის თემაზე პროკურორებისთვის ტრენინგი ჩატარდა

სამართალი - 17:46, 06 Mar, 2015

1343

საქართველოს მთავარ პროკურატურაში, სახელმწიფოს პროცესუალური ვალდებულებებისა და დისკრიმინაციის აკრძალვის თემაზე პროკურორებისთვის ტრენინგი ჩატარდა. ორდღიანი სწავლების ფარგლებში, განხილული იყო ადამიანის უფლებათა და ძირითად თავისუფლებათა ევროპული კონვენცია, საქართველოს კანონმდებლობა და არსებული პრაქტიკა - დისკრიმინაციასთან ბრძოლის თემაზე.

პროექტი ევროსაბჭოს მხარდაჭერით - ევროპის საბჭოსა და ევროპის კავშირის ერთობლივი პროექტის „ადვოკატთა და ადამიანის უფლებების დამცველთა შესაძლებლობების გაძლიერება ადამიანის უფლებათა ევროპული კონვენციისა და ევროპის შესწორებული სოციალური ქარტიის შიდასახელმწიფოებრივ დონეზე გამოყენებისათვის“ ფარგლებში განხორციელდა.

ტრენინგი თეორიულ სწავლებასთან ერთად, დატვირთული იყო პრაქტიკული სავარჯიშოებით. მოწვეულმა ექსპერტებმა პროკურორებს გააცნეს ადამიანის უფლებათა დაცვის ევროპული სისტემა, კანონი დისკრიმინაციის ყველა ფორმის აკრძალვის შესახებ, ევროპული კონვენციის მიხედვით დისკრიმინაციისგან დაცვის წყაროები, პროცესუალური ვალდებულებები და სახალხო დამცველის აპარატის უფლებამოსილება. ტრენინგის ბოლოს მონაწილეებმა რეალური მაგალითი განიხილეს და იმიტირებული სასამართლო პროცესი ჩაატარეს.

განხორციელებულ სასწავლო აქტივობაში პროკურატურის სისტემის სხვადასხვა ტერიტორიული ორგანოებიდან 21 პროკურორი იღებდა მონაწილეობას. ევროსაბჭოსთან და სხვა პარტნიორ ორგანიზაციებთან თანამშრომლობით დისკრიმინაციის აკრძალვის თემაზე პროკურორების სწავლება მომავალშიც აქტიურად გაგრძელდება.