სამინისტრო ორ სამსახურად იყოფა, ე.წ უდოს კომისია უქმდება- ცვლილებები მღებრიშვილის უწყებაში

სამართალი - 13:01, 06 Mar, 2015

936

პარლამენტში სასჯელაღსრულების სისტემის რეფორმირებაზე მსჯელობა და ამ მიმართულებით საკანონმდებლო პაკეტის განხილვა მიმდინარეობს.

სასჯელაღსრულებისა და პრობაციის მინისტრის მოადგილემ კახა კახიშვილმა პარლამენტს "პატიმრობის კოდექსში" შესატანი ცვლილებები და მისი თანმდევი საკანონმდებლო პაკეტი პირველი მოსმენით წარუდგინა.

წარდგენილი ცვლილებების თანახმად, უქმდება სასჯელაღსრულების არსებული დეპარტამენტი და მის ნაცვლად სამინისტროს სტრუქტურული ქვედანაყოფი - პენიტენციური დეპარტამენტი ყალიბდება.

სამინისტრო ორ მიმართულებად - სამოქალაქო სამსახურად და სპეციალურ პენიტენციურ სამსახურად იყოფა. სამოქალაქო სამსახურში ე.წ. დამხმარე ფუნქციების მქონე სამინისტროს სტრუქტურული ქვედანაყოფები ერთიანდება. აღნიშნული ქვედანაყოფები საჯარო მოსამსახურეებით დაკომპლექტდება, რომელთაც სპეციალური წოდებები არ ექნებათ და სპეციალური მომზადების კურსების გავლა არ მოეთხოვებათ.

სპეციალურ პენიტენციურ სამსახურში პენიტენციური დაწესებულებები და სამინისტროს ის სტრუქტურული ქვედანაყოფები გაერთიანდება, რომელთა საქმიანობაც სასჯელის უშუალო აღსრულება და მასთან უშუალოდ დაკავშირებული ძირითადი ფუნქციებია. სპეციალური პენიტენციური სამსახურის მოსამსახურეები არიან სპეციალური სტატუსის მქონე (პოლიციელთან გათანაბრებული), წოდების მქონე, სპეციალურად მომზადებული პირები. პენიტენციურ დეპარტამენტს მინისტრის მიერ დანიშნული გენერალური დირექტორი უხელმძღვანელებს.

ამასთან, უქმდება სამინისტროს პირობით ვადამდე გათავისუფლების კომისია. ეს ფუნქცია მხოლოდ ადგილობრივ საბჭოებს დარჩება, რომელთა გადაწყვეტილებების გადახედვის უფლება ექნება მხოლოდ სასამართლოს.
წარმოდგენილი ცვლილებებით ევროპის საბჭოს რეკომენდაციების შესაბამისად, მსჯავრდებულის სამარტოო საკანში მოთავსების ვადა 20 დღიდან 14 დღემდე მცირდება.

_{ნინო ზედგენიძე}