„თქვენ განსაჯეთ გადადგა თუ არა ახმეტის პოლიციის უფროსი ზურაბ უძილაური საკუთარი ნებით თანამდებობიდან“, - ასე უპასუხა შს მინისტრმა ჟურნალისტების კითხვას, გახდა თუ არა მისი განცხადება ახმეტის პოლიციის უფროსის თანამდებობიდან წასვლის საფუძველი.

„მე გითხარით, რომ რეაგირებას მოვახდენდი. თქვენ როგორ ფიქრობთ, ის თავის ნებით წავიდა? ეს კაცი არ წასულა თავისი ნებით. ასე რომ, კითხვას პასუხი მგონი გაცემული აქვს. მინისტრს აქვს უფლება დანიშნოს ასეთი ადამიანი, თუმცა მე მიზანშეწონილად არ მიმაჩნია, რომ ასეთი პიროვნება თანამდებობაზე მუშაობდეს“, - განაცხადა გომელაურმა.

ახმეტის პოლიციის უფროსი ზურაბ უძილაური თანამდებობიდან გუშინ გათავისუფლდა.

გავრცელებული ინფორმაციით, უძილაური ნარკოტიკული ნივთიერების მოხმარების და ხულიგნობის მუხლით არის ნასამართლევი. უძილაურის საქმეზე პროკურატურაში მოკვლევა მიმდინარეობდა.