რუსეთის ფედერაციასა და აფხაზეთის დე ფაქტო მთავრობას შორის გაფორმებული თანამშრომლობისა და სტრატეგიული პარტნიორობის შესახებ ხელშეკრულება ძალაში დღეს შევიდა. მხარეების მიერ, რატიფიცირებული დოკუმენტების გაცვლის ცერემონიალი, დღეს რუსეთის საგარეო საქმეთა სამინისტროში გაიმართა.

აღნიშნულ ინფორმაციას „რია ნოვოსტი“ ავრცელებს.

ცერემონიაზე, აფხაზეთის მხარეს რუსეთში აფხაზეთის ე.წ. ოფიციალური ელჩი, იგორ ახბა, ხოლო რუსეთის მხარეს კი საგარეო საქმეთა მინისტრის მოადგილე, გრიგორი კარასინი წარმოადგენდნენ.

ხელშეკრულებაში არსებული პუნქტის მიხდვით, ის ძალაში მაშინ შევიდოდა, როცა მხარეები სარატიფიკაციო სიგელების გაცვლას მოახდენდნენ. შესაბამისად, რუსეთის ფედერაციასა და აფხაზეთის ე.წ რესპუბლიკას შორის, თანამშრომლობისა და სტრატეგიული პარტნიორობის შესახებ გაფორმებული ხელშეკრულება, რომელიც რუსეთსა და აფხაზეთს შორის უსაფრთხოებისა და თავდაცვის საერთო სივრცის შექმნას ითვალისწინებს, ძალაში 2015 წლის 5 მარტს შევიდა.

შეგახსენებთ, ხელშეკრულებას ხელი რუსეთისა და აფხაზეთის ე.წ. პრეზიდენტმა, 2014 წლის 24 ნოემბერს მოაწერეს. აფხაზეთის დე ფაქტო პარლამენტმა მისი რატიფიცირება 22 დეკემბერს მოახდინა. რაც შეეხება რუსეთს, ხელშეკრულების რატიფიცირებას რუსეთის დუმამ მხარი 2015 წლის 23 იანვარს, ხოლო ფედერაციულმა საბჭომ კი 28 იანვარს დაუჭირა.

ხატია ლაღიძე