სასწრაფო სამედიცინო სამსახურში სისტემური ხარვეზებია- სერგეენკო

ჯანმრთელობა - 13:35, 05 Mar, 2015

1913

ჯანდაცვის მინისტრმა დავით სერგეენკომ სასწრაფო სამედიცინო დახმარების სამსახურში არსებული პრობლემების შესახებ ისაუბრა. სერგეენკოს თქმით, ზოგჯერ სასწრაფო დახმარების დაგვიანება 45 წუთით ან 1 საათით ხდება. სერგეენკსოს თქმით, ეს პრობლემები ატარებს სისტემურ ხასიათს და მათ გადასაჭრელად შემუშავებულია გეგმა, რომელსაც ჯანდაცვის სამინისტრო „112“-ის წარმომადგენლებს დღეს გააცნობს.

„დავასრულეთ სასწრაფო სამედიცინო სამსახურის სისტემური შესწავლა, იკვეთება გარკვეული ხარვეზები. სახეზეა დაგვიანების უარყოფითი დინამიკა. ჩვენ შევიმუშავეთ სამოქმედო გეგმა, მას შევთავაზებთ სასწრაფო სამედიცინო სამსახურის უწყებას და თუ ეს გეგმა განხორციელდება უახლოეს მომავალში ვიგრძნობთ დადებით შედეგებს.

სასწრაფოს გამოძახებიდან მათ ადგილზე მისვლამდე ხშირად ძალიან დიდი დრო იხარჯება, სასწრაფოს ბრიგადებს არ აქვთ მოტივაცია შეასრულონ ბევრი გამოძახება, როდესაც დისპეჩერს უნდა მიუვიდეს განთავისუფლების სიგნალი, ეს იწელება საშუალოდ 15 წუთი, რაც ქმნის სურათს, თითქოს ბრიგადების რაოდენობა არის არასაკმარისი. მისაღებია სისტემური გადაწყვეტილებები და ჩვენ მზად ვართ გავუწიოთ უწყებას შესაბამისი რეკომენდაციები“,-განაცხადა დავით სერგეენკომ.

ეს განცხადება დავით სერგეენომ ჟურნალისტებთან მთავრობის სხდომის დაწყების წინ გააკეთა.