დამკვეთი-უკრაინა, შემსრულებელი- ჩეჩნები - რუსულმა მედიამ ნემცოვის მკვლელობა "გახსნა"

მსოფლიო - 11:33, 03 Mar, 2015

10044

რუსულ მედიაში ნემცოვის მკვლელობის ვერსიებიდან, აქტიურად იმ ვერსიის ლობირება ხდება, სადაც ნემცოვის მკვლელობას უკრაინასთან აკავშირებენ და მკვლელობის მიზნად პუტინის დისკრედიტაცია განიხილება. ამ ვერსიას აქტიურად აშუქებს სახელმწიფო მედიაც.

რუსული მედიის ინფორმაციით- ბორის ნემცოვის საქმეზე მომუშავე გამომძიებლების ერთ-ერთი ვერსიით რუსი ოპოზიციონერი უკრაინული სპეცსამსახურების დაკვეთით, ჩეჩენმა მებრძოლებმა მოკლეს, კერძოდ კი ჯოხარ დუდაევის ბატალიონის წევრებმა.

მათი ინფორმაციით მკვლელობის ორგანიზატორები შეიძლება ყოფილიყვნენ დუდაევის დანაყოფის ყოფილი მეთაური ადამ ოსმაევი, რომელიც პუტინზე თავდასხმის მზადების საქმეშიც ფიგურირებდა და მისი მეუღლე ამინა ოკუევა. მკვლელობის მიზანი კი რუსული ხელისუფლების დისკრედიტაცია და პოლიტიკური სიტუაციის დესტაბილიზაცია.

რუსული სპეცსამსახურები ამ დროისთვის ნემცოვის მკვლელობის მომზადებაში და შესრულებაში მონაწილე ადამიანების რაოდენობას ადგენენ.

შეგახსენებთ, ჯოხარ დუდაევის სახელობის ბატალიონი უკრაინაში ოფიციალური კიევის მხარეს იბრძვის და მისი მეთაური, ერთი თვის წინ გარდაცვლილი ისა მუნაევი იყო.

ანალიტიკოსების აზრით, ნემცოვის მკველეობით და შემდეგ მსგავსი ვერსიების გავრცელებით, პუტინის რეჟიმმა ორმაგი სარგებელი მიიღო, თავიდან მოიშორა რუსული ოპოზიციის ერთ-ერთი თვალსაჩინო ლიდერი და ამასთანავე ხელს უწყობს ოფიციალური კიევის და უკრაინაში მებრძოლი ჩეჩნების დისკრედიტაციას.

_{ნინო ზედგენიძე}