ბორის ნემცოვის მკვლელობის ერთ-ერთ ვერსიად შეკვეთილ მკვლელობა განიხილება

მსოფლიო - 10:51, 28 Feb, 2015

2362

რუსეთის ფედერაციის საგამოძიებო კომიტეტის ოფიციალური წარმომადგენლის ინფორმაციით, ბორის ნემცოვს მინიმუმ შვიდ-რვაჯერ ესროლეს. სისხლის სამართლის საქმე ორი მუხლით „მკვლელობა“ და „იარაღის უკანონო ბრუნვა“ არის აღძრული.

საგამოძიებო კომიტეტის ინფორმაციით, გამოძიება რუსი პოლიტიკოსის მკვლელობის რამდენიმე ვერსიაზე მუშაობს. მათ შორისაა შეკვეთილი მკვლელობა.

რუსეთის შს მინისტრმა ვლადიმერ კოლოკოლცევმა ბორის ნემცოვის მკვლელობის გამოძიება პირად კონტროლზე აიყვანა.

რუსული მედიის ინფორმაციით, ვიდეოკამერებმა დააფიქსირეს, რომ პოლიტიკოსს თეთრი მანქანიდან ესროლეს. კამერებმა კი, მკვლელობის დროს ხიდზე გამავალი სამი მანქანა დააფიქსირეს. ავტომობილების სანომრე ნიშნები უკვე ცნობილია და ამჟამად მათი ძებნა მიმდინარეობს. ამავდროულად, თვითმხილველები აცხადებენ, რომ ავტობოლზე რომლიდანაც პოლიტიკოსს ესროლეს, ნომრები არავის დაუფისირებია.

გამოძიება გარდა შეკვეთილი მკვლელობის ვერსიისა, მუშაობს ასევე ნემცოვის სამეწარმეო საქმიანობასთან დაკავშირებულ ვერსიაზე, ასევე ვერსიაზე, რომელიც მის პოლიტიკურ საქმიანობას უკავშირდება იაროსლავის ოლქში. არ არის გამორიცხული ეჭვიანობაც.

ოპოზიციონერი პოლიტიკოსი ბორის ნემცოვი მოსკოვის ცენტრში წუხელ ჩაცხრილეს.

ნემცოვი მოძრაობა „სოლიდარობის“ დამფუძნებელი და პარტია «РПР-ПАРНАС»-ის თანათავმჯდომარე იყო. ბორის ნემცოვმა პოლიტიკური მოღვაწეობა 1991 წელს ნიჟეგოროდის ოლქის გუბერნატორის თანამდებობით დაიწყო. ორი ვადის გასვლის შემდეგ, ნემცოვმა რუსეთის მთავრობაში განაგრძო მუშაობა. იყო ნავთობისა და გაზის მინისტრი. 1997 წელს მთავრობის მეთაურის პირველი მოადგილე გახდა. შედიოდა რუსეთის უსაფრთხოების საბჭოში. გადადგომის შემდეგ, 1999—2003 წლებში გახდა დუმის დეპუტატი. 2013 წლის არჩევნებში იაროსლავის ოლქის დეპუტატად აირჩიეს.

_{ნინო ზედგენიძე}