თელავის რაიონის სოფელ იყალთოში 43 წლის მამაკაცმა 76 წლის მამა ცემით მოკლა. როგორც „კვირის პალიტრასთან“ გარდაცვლილის მეზობლები ჰყვებიან შვილი ცალკე ცხოვრობდა, მაგრამ მამას ხშირად სტუმრობდა. კონფლიქტის ძირითადი მიზეზი კი ალკოჰოლი იყო. როგორც ახლობლები ამბობენ, შვილი ბევრს სვამდა, რის გამოც მამა საყვედურობდა, კონფლიქტიც ასე იწყებოდა, თუმცა ვერავინ წარმოიდგენდა, რომ შვილი მამას სასიკვდილოდ გაიმეტებდა.

„დილას გამოსულა სახლიდან და მეზობლებისთვის უთქვამს, - მამაჩემი მოკვდაო. მეზობლებს რომ უკითხავთ, - რა მოუვიდაო, უპასუხია, - კიბეზე დაგორდა და თავი დაარტყაო... სახლში რომ შევიდნენ, საწყალი ჯიმშერი დასისხლიანებული დახვდათ. სასწრაფო დახმარების ბრიგადას გამოუძახეს, რომელსაც პოლიცია მოჰყვა. დაადგინეს, რომ კი არ დაგორდა, შვილმა ცემაში ამოხადა სული. საწყალი კაცი ღამითვე მომკვდარა. ამბობენ, თავი აქვს დაზიანებულიო. როგორც ჩანს, ისეთი მთვრალი იყო, ვერ მოზომა. რა საშინელი ბედისწერა ჰქონია საწყალ კაცს - საკუთარი შვილის ხელით სიკვდილი“, - ამბობენ ადგილობრივები.

შემთხვევა სოფელ აფენში გუშინ მოხდა. სამართალდამცველებმა, ცხელ კვალზე ჩატარებული ოპერატიულ-საგამოძიებო მოქმედებების შედეგად, ვასილ ა. დანაშაულის ჩადენიდან რამდენიმე საათში საკუთარ საცხოვრებელ სახლში დააკავეს. გამოძიება განზრახ მკვლელობის ფაქტზე მიმდინარეობს

წყარო: "კვირის პალიტრა"