უკრაინის პრეზიდენტის, პეტრო პოროშენკოს განცხადებით, უკრაინული მხარე ნებისმიერ დროს მზად არის სადემარკაციო ხაზს დაუბრუნდეს.

„მინსკის ხელშეკრულების შესაბამისად, კონფლიქტის ზონიდან სამხედრო ტექნიკის გაყვანა დავიწყეთ. ეს პირველი ნაბიჯია, იმის გამოსაცდელად შეასრულებენ თუ არა „ბოევიკები“ მინსკის ხელშეკრულებას, რომელსაც ამ დრომდე არღვევენ. ამიტომ, მინდა აღვნიშნო, რომ უკრაინული მხარე ნებისმიერ დროს მზად არის ფრონტის ხაზს დაუბრუნდეს და სეპარატისტებთან ბრძოლა განაგრძოს“- განაცხადა პოროშენკომ.

შეგახსენებთ, გუშინ პეტრო პოროშენკომ ფრონტის ხაზიდან საბრძოლო ტექნიკის გაყვანის ბრძანება გასცა. უკრაინულმა მხარემ, დონბასიდან სამხედრო ტექნიკის გაყვანაც დაიწყო. იგივეს აცხადებენ „ბოევიკები“, თუმცა უკრაინული მხარე ამ ფაქტს არ ადასტურებს.

ხატია ლაღიძე