აშშ-ის სახელმწიფო მდივნის, ჯონ კერის თქმით, რუსეთის ხელისუფლების განცხადება, აღმოსავლეთ უკრაინაში რუსული სამხედრო ტექნიკის არარსებობის შესახებ, სიმართლეს არ შეესაბამება და რუსეთის ხელისუფლების წარმომადგენლები უკრაინის საკითხთან დაკავშირებით, მუდმივად იტყუებიან.

„ისინი იტყუებიან. რუსეთი ყველაზე მასშტაბური პროპაგანდით არის დაკავებული, რაც კი ცივი ომის შემდეგ დაწყებულა. ისინი რეალობას ამახინჯებენ და ამას რაც გინდათ უწოდეთ, თუმცა ცხადია, ისინი მე მატყუებენ. მატყუებენ სხვა საკითხებთან დაკავშირებითაც“- განაცხადა ჯონ კერიმ სენატში სიტყვით გამოსვლისას.

მისივე თქმით, ამერიკის შეერთებული შტატების ხელისუფლებას, უკრაინისთვის თავდაცვითი იარაღის გადაცემასთან დაკავშირებით, გადაწყვეტილება ჯერაც არ მიუღია.

„ამ საკითხთან დაკავშირებით კონგრესი და ობამას ადმინისტრაცია ჯერ კიდევ მსჯელობს“ - აღნიშნა სახელმწიფო მდივანმა.

შეგახსენებთ, უკრაინის პრეზიდენტი, პეტრო პოროშენკო რამდენიმე თვეა დასავლეთს თავდაცვითი იარაღის მიწოდებას სთხოვს.

ხატია ლაღიძე