ეროსი კიწმარიშვილის ძმა ზურა კიწმარიშვილი ამბობს, რომ საქმეში ახალი გარემოებები გამოიკვეთა, რაც ოთხი მოწმის გამოჩენას გულისხმობს.

როგორც „კვირის პალიტრასთან“ საუბრისას კიწმარიშვილი ამბობს, მოწმეები კიწმარიშვილის საქმეში ძალიან საინტერესო დროს და ადგილას ჩანან. გამოძიების ინტერესიდან გამომდინარე ეროსი კიწმარიშვილის ძმა ზუსტ დროს და ადგილს ვერ ასახელებს.

„არ ვამტკიცებთ, თუმცა, არც გამოვრიცხავ, რომ რომელიმე მათგანი იყოს დამნაშავე, მკვლელობის თანამონაწილე, ან ჰქონდეს ინფორმაცია, რომელიც საქმის გახსნას შეუწყობს ხელს“, - ამბობს კიწმარიშვილი.

იგი არ გამორიცხავს, რომ ოთხი მოწმიდან რომელიმე ეროსი კიწმარიშვილთან წარსულში რაიმე კავშირი ჰქონოდა.

„გამოიკვეთა ოთხი პირი, რომელთაგან სამი დაკითხულია, ერთის კვალი ჯერ არ ჩანს... არის სხვა ინფორმაციაც, რომელიც ამ ხალხს უკავშირდება, ამიტომაც გახდნენ გამოძიებისთვის საინტერესო. მოხდა მათი იდენტიფიცირება, ყველაფრის თქმა არ შემიძლია... ისინი სხვადასხვა მიზეზით გამოჩნდნენ და ამას წინ რა უძღოდა, ვერ გეტყვით... მათ შორის არის პირი, რომელზეც გამოძიებას აქამდეც ჰქონდა ინფორმაცია, მაგრამ ჩვენი ბოლო შეხვედრის შემდეგ, მის მიმართ ინტერესმა მოიმატა“, - განაცხადა ზურა კიწმარიშვილმა.

წყარო: "კვირის პალიტრა"

ნინო დათაშვილი