უკრაინის პრეზიდენტი, პეტრო პოროშენკო ვიქტორ იანუკოვიჩის განცხადებას ეხმაურება და ამბობს, რომ უკრაინა მას მოუთმენლად ელოდება.

„ვფიქრობ, ეს უკრაინისთვის კარგი იქნება. თუმცა, დარწმუნებული არ ვარ, რომ მისთვისაც კარგი შედეგით დასრულდება. იანუკოვიჩს მოითმენლად ველოდებით და მზად ვართ მასთან შესახვედრად. რაც უფრო მალე დაბრუნდება უკრაინაში, ქვეყნისთვის უკეთესი იქნება. დაბრუნდეს და ჩაუდგეს საპროტესტო მოძრაობას სათავეში. საუკეთესო შემთხვევაში, ის ციხეში აღმოჩნდება“- განცხადა პოროშენკომ.

შეგახსენებთ, უკრაინის ყოფილმა პრეზიდენტმა ვიქტორ იანუკოვიჩმა რუსულ „პირველ არხთან“ მიცემულ ინტერვიუში განაცხადა, რომ როგორც კი შესაძლებლობა მიეცემა, უკრაინაში დაბრუნდება და საპროტესტო მოძრაობას ჩაუდგება სათავეში.

ერთი წლის წინ იანუკოვიჩი ქვეყნიდან გაიქცა. 2014 წელს, კიევში ანტისამთავრობო დემონსტრაციები დაიწყო. რამდენიმეთვიანი საპროტესტო აქციები ტრაგედიითა და მომიტინგეთა დახოცვით დასრულდა. რის შემდეგაც, იანუკოვიჩმა კონსტიტუციურ უფლებამოსილებაზე თვითნებური უარი განაცხადა და რუსეთში გაიქცა.

მშვიდობიანი მოსახლეობის დახოცვასა და სამსახურებრივი უფლებამოსილების გადამეტების მუხლით, იანუკოვიჩისა და რამდენიმე მაღალჩინოსნის წინააღმეგ სისხლის სამართლის საქმე აღიძრა.

უკრაინის გენერალურმა პროკურატურამ, ვიქტორ იანუკოვიჩის ექსტრადირების მოთხოვნით რუსეთს ოფიციალურად მიმართა. რუსეთის ხელისუფლება კი აცხადებს, რომ იანუკოვიჩის უკრაინისთვის გადაცემას არ აპირებს.

ხატია ლაღიძე