ლატვიის ეროვნული შეიარაღებული ძალები მზადაა, უკრაინაში ევროკავშირის სამშვიდობო ოპერაციას მხარი დაუჭიროს და სამშვიდობო მისიით ჯარისკაცები გაგზავნოს, იმ შემთვევაში თუ შესაბამის გადაწყვეტილებას გაერო-ს უშიშროების საბჭო და ლატვიის სეიმი მიიღებს.

ამის შესახებ განცხადებას, ლატვიის თავდაცვის მინისტრი, რაიმონდ ვეიონისი აკეთებს.

მისი თქმით, კონფლიქტი მხოლოდ დიპლომატიური გზით უნდა მოგვარდეს, ამის წინაპირობა კი მინსკის ხელშეკრულების შესრულებაა. ლატვიის თავდაცვის მინისტრის თქმით, სამშვიდობო მისიამ შესაძლოა სიტუაცია დაასტაბილუროს.

„შესაძლოა, სამშვიდობო მისია ის ეთერთი ინსტრუმენტია, რომელიც უკრაინაში სიტუაციის დარეგულირებაში დაგვეხმარება“ - განაცხადა ვეიონისმა.

შეგახსენებთ, უკრაინის პრეზიდენტმა ევროსაბჭოს პრეზიდენტ დონალდ ტუსკს, გაერო-სა და ევროსაბჭოს უშიშროების სხდომის მოწვევის, ასევე დონბასში სამხედრო ექსპერტებისა და პოლიციის მისიის გაგზავნის ინიციატივით მიმართა.

გუშინ გამართულ უშიშროების საბჭოს კრებაზე, კი პოროშენკომ თავდაცვის ზომების გაძლიერებაზე ისაუბრა და გაერო-ს დონბასში მშვიდობისმყოფელების მისიის გაგზავნა სთხოვა. რასაც მოსკოვისა და სეპარატისტების მხრიდან პირველი კომენტარიც მოჰყვა. რუსეთის საგარეო საქმეთა სამინისტროს წარმომადგენლის, ალექსანდრ ლუკაშევიჩის განცხადებით, რუსეთი მზად არის უკრაინის სამშვიდობო მისიაში თავისი კადრები გაგზავნოს. უკრაინის პრეზიდენტის, პეტრო პოროშენკოს განცხადებით კი, რუსეთი აგრესორი ქვეყანაა და დონბასის სამშვიდობო მისიაში მონაწილეობას ვერ მიიღებს.

ხატია ლაღიძე