დიდი ბრიტანეთის საგარეო საქმეთა მინისტრის, ფილიპ ჰამონდის განცხადებით, შესაძლოა ბრიტანეთმა უკრაინის შეიარაღების საკითხს გადახედოს.

დიდი ბრიტანეთი მიიჩნევს, რომ უკრაინის კონფლიქტი არა სამხედრო, არამედ პოლიტიკური გზით უნდა გადაწყდეს. თუმცა, მინისტრის თქმით, ლონდონი „უფლებას იტოვებს ამ შესაძლებლობასაც გადახედოს.“

მისივე თქმით, რუსეთი და მისი პრეზიდენტი, ვლადიმერ პუტინი აგრესიულად არა მხოლოდ უკრაინაში, არამედ სხვა ადგილებშიც იქცევიან და ამით „ნატო-ს თავდაცვისუნარიანობის გამოცდას“ ცდილობენ.

მან იმედი გამოთქვა, რომ კრემლი „ძალიან კარგად ხვდება სხვაობას“ უკრაინასა და ევროკავშირის წევრ ბალტიისპირეთის ქვეყნებს შორის.

„მნიშვნელოვანია, კრემლს ყველა შესაძლებლობით შევახსენოთ, რომ ნატო-ს წევრ ქვეყნებს კოლექტიური უსაფრთხოების კონვენციის მე-5 მუხლი იცავს. უნდა ახსოვდეს, რომ არსებობს „წითელი ხაზი“- განაცხადა ჰამონდმა.

აღსანიშნავია, გუშინ დიდი ბრიტანეთის თავდაცვის მინისტრმა, მაიკლ ფალონმა განაცხადა, რომ რუსეთი ბალტიისპირეთის ქვეყნებს - ლატვიას, ლიტვასა და ესტონეთს სერიოზულ საფრთხეს უქმნის.

მისი თქმით, ვლადიმერ პუტინი ბალტიისპირეთის ქვეყნებზე ზეწოლის განხორციელებას ცდილობს.

„გამორიცხული არ არის, ბალტიისპირეთის რეგიონში სიტუაციის დესტაბილიზაცია ისევე დაიწყოს, როგორც ეს უკრაინაში მოხდა“ - განაცხადა მაიკლ ფალონმა.

ხატია ლაღიძე