კახეთის გუბერნატორის ყოფილი მოადგილის გიორგი სიბაშვილის სასამართლო პროცესი უკვე მერვედ გადაიდო. ამის მიზეზი კვლავ ის გახდა, რომ პროკურორი გიორგი ლილუაშვილი სასამართლო პროცესზე არ გამოცხადდა.

აღნიშნული ფაქტი სიბაშვილმა გააპროტესტა და სასამართლოს ეზოში ხელზე ბორკილები დაიდო.

"ეს არის ბორკილები, რომელიც ვერ მოახერხა პროკურატურამ, რომ ჩემთვის დაედო. იძულებული ვხდები, რომ ეს ბორკილები დავიდო სასამართლოს ეზოში მე თვითონ, ჩემი ხელით. როდესაც ბრალი წარმიდგინეს, ბრალის წარდგენის დროს მე ვამბობდი, რომ ბრალი არის უსუსრი, ყველა მტკიცებულება გამოკვლეულია, ფაქტიურად ბრალი დარჩა ბრალად და გრძელდება პოლიტიკური დევნა. მინდა მივმართო პროკურატურას, რომ ყველაზე მთავარი რაც თქვენ გინდათ, რომ მე პატიმარი ვიყო, ვერ ვიქნები პატიმარი თუ არ მიეცით მართლმსაჯულებას იმის საშუალება, რომ მე გამასამართლონ“, - განაცხადა სიბაშვილმა.

პროცესი 2 მარტისთვის გადაიდო. გამოძიება გიორგი სიბაშვილს 5 ეპიზოდში ედავება.

ნინი კაციტაძე