უკრაინის პრეზიდენტი, პეტრო პოროშენკო დონბასში ვითარების კონტროლისა და კოორდინაციაში დასახმარებლად, ევროკავშირის სამხედრო ექსპერტებს იწვევს.

ინფორმაცია ამის შესახებ, პრეზიდენტის ოფიციალურ ვებგვერდზე გავრცელდა.

დონბასში არსებული ვითარება პოროშენკომ, ევროსაბჭოს პრეზიდენტ - დონალდ ტუსკთან სატელეფონო საუბრისას განიხილა. უკრაინის პრეზიდენტმა დონალდ ტუსკს, გაერო-სა და ევროსაბჭოს უშიშროების სხდომის მოწვევისა და დონბასში სამხედრო ექსპერტების გაგზავნის ინიციატივით მიმართა.

შეგახსენებთ, გუშინ უკრაინის უშიშროების საბჭოს კრებაზე, პრეზიდენტმა პოროშენკომ თავდაცვის ზომების გაძლიერებაზე ისაუბრა და გაერო-ს დონბასში მშვიდობისმყოფელების მისიის გაგზავნა სთხოვა. რასაც მოსკოვისა და სეპარატისტების მხრიდან პირველი კომენტარიც მოჰყვა. რუსეთის საგარეო საქმეთა სამინისტროს წარმომადგენლის, ალექსანდრ ლუკაშევიჩის განცხადებით, რუსეთი მზად არის უკრაინის სამშვიდობო მისიაში თავისი კადრები გაგზავნოს. უკრაინის პრეზიდენტის, პეტრო პოროშენკოს განცხადებით კი, რუსეთი აგრესორი ქვეყანაა და დონბასის სამშვიდობო მისიაში მონაწილეობას ვერ მიიღებს.

აღმოსავლეთ უკრაინაში ვითარება ამ დრომდე დაძაბულია. 12 თებერვლის მინსკის მოლაპარაკებისა და ცეცხლის რეჟიმის ამოქმედების მიუხედავად, კონფლიქტის ზონაში საომარი მოქმედებები არ წყდება.

გუშინ, დებალცევოდან უკრაინული არმიის ევაკუაციაც დასრულდა . ქალაქზე სრულ კონტროლს "ბოევიკები" ფლობენ.

ხატია ლაღიძე