კიწმარიშვილის საქმეში გამოჩენილი "უცნობი" ადამიანები იდენტიფიცირებული არიან

სამართალი - 20:35, 19 Feb, 2015

1938

ეროსი კიწმარიშვილის ძმის ზურაბ კიწმარიშვილის განცხადებით, მისი ძმის გარდაცვალების საქმეში ცოტა ხნის წინ გამოკვეთილი პირები უკვე იდენტიფიცირებული არიან და ორი მათგანი უკვე დაიკითხა. ეს განცხადება კიწმარიშვილმა პროკურატურაში ვიზიტის დასრულების შემდეგ გააკეთა.
კიწმარიშვილის თქმით, გამოძიება ამ ეტაპზე საქმის კვალიფიკაციის შეცვლის საჭიროებას ვერ ხედავს.
ზურაბ კიწმარიშვილის განცხადებით ის იდენტიფიცირებული პირებიდან არცერთს არ იცნობს. მისი თქმით არსებობს თუ არა რამე კავშირი ეროსი კიწმარიშვილის გარდაცვალებასა და ამ ადამიანებს შორის პროკურატურამ უნდა დაადგინოს და იგი წინასწარ შეფასებას ვერ გააკეთებს.

"დღეს რა ინფორმაციასაც ოფიციალურად ადასტურებს გამოძიება, ამის საფუძველზე ის მიზანშეწონილად არ თვლის საქმეზე კვალიფიკაციის შეცვლას. ახალი გარემოებები არის ის, რომ ის ხალხი, ვისგანაც აპირებდა გამოძიება გარკვეული ინფორმაციის მოპოვებას, არიან ძირითადად იდენტიფიცირებული და გამოძიებამ მათგან პირველადი ინფორმაცია მოიპოვა. ვფიქრობ, ეს ინფორმაცია, რაც გამოძიებისთვის გახდა ცნობილი, არ არის საკმარისი და კიდევ უნდა მას დამუშავება. რაც შეეხება იმას, თუ ვინ არიან ეს ადამიანები, მე ამ ეტაპზე ვერ გეტყვით, ვინაიდან ეს პროცესი არ დამთავრებულა. ეს ხალხი ჩვენი მოთხოვნით და გამოძიებამაც ასე ჩათვალა, ჯერჯერობით გამოძიების ინტერესების ქვეშ არიან და უახლოეს დღეებში კიდევ შეეცდებიან უფრო მეტი ინფორმაციის მოპოვებას მათ შესახებ. რაც შეეხება ამ ადამიანების რაოდენობას, რომლებიც ინტერესის ქვეშ მოხვდნენ, მინიმუმ ეს არის სამი ადამიანი, რომელთაგან ორი უკვე დაკითხულია და არ არის გამორიცხული, რომ ისინი კიდევ ერთხელ დაიკითხონ",-განაცხადა ზურაბ კიწმარიშვილმა.

შეგახსენებთ, რომ გარდაცვლილი ეროსი კიწმარიშვილის ძმა, ზურაბ კიწმარიშვილი დღეს 6 საათზე მეტ ხანს პროკურატურაში იმყოფებოდა და საქმეში გამოჩენილ ახალ დეტალებს ეცნობოდა.