უკრაინის თავდაცვის სამინისტროს პრესსამსახურის განცხადებით, პრორუსულმა სეპარატისტებმა 90-ზე მეტი უკრაინული მეომარი ტყვედ ჩაიგდეს.

უცნობია 82 მებრძოლის ადგილმდებარეობა.

უკრაინელ სამხედროებზე თავდასხმა მაშინ განხორციელდა, როცა ისინი დებალცევოს ტოვებდნენ.

„ბოევიკების“ მიერ გავრცელებული ინფორმაციით, 150 უკრაინელი მეომარი მათ თავიანთი ნებით ჩაბარდა, რასაც სამინისტრო არ ადასტურებს და აცხადებს , რომ პრორუსული სეპარატისტების მიერ გავრცელებული ინფორმაცია გარდაცვლილთა და ტყვედ აყვანილთა შესახებ, გაზვიადებულია.

შეგახსენებთ, გასული დღე-ღამის განმავლობაში კონფლიქტის ზონაში „ბოევიკების“ თავდასხმების შედეგად დაიღუპა 14 და დაიჭრა 174 უკრაინელი მებრძოლი.

ცეცხლის შეწყვეტის რეჟიმის ძალაში შესვლის მიუხედავად, აღმოსავლეთ უკრაინაში საბრძოლო მოქმედებები არ წყდება. სამდღიანი სასტიკი შეტაკებების შედეგად, უკრაინულმა მეომრებმა ქალაქი დებალცევო დატოვეს. დებალცევოზე სრულ კონტროლს პრორუსული სეპარატისტები ფლობენ.

ხატია ლაღიძე