უკრაინის გენერალური პროკურორის მოადგილე დავით საყვარელიძე მიხეილ სააკაშვილის და ზურაბ ადეიშვილის საქართველოში ექსტრადირებაზე პირველ კომენტარს აკეთებს.

„რუსთავი2“-თან საუბრისას ყოფილი ქართველი დეპუტატი ამბობს, რომ ინტერესთა კონფლიქტის გამო აღნიშნული საკითხი განხილვაში სავარაუდოდ, არ ჩაერთვება.

რაც შეეხება ექსტრადირებასთან დაკავშირებით საქართველოს პროკურატურიდან გაგზავნილ წერილს, საყვარელიძის განმარტებით, წერილი მასთან არ მისულა.

„მე ვიცი, რომ ადრე უკრაინის პროკურატურას უარი აქვს ნათქვამი, კონკრეტულად ზურაბ ადეიშვილის გადაცემაზე. რაც შეეხება სხვა დანარჩენს, ჩემამდე არ მოსულა, რომც მოვიდეს ინტერესთა კონფლიქტი მაქვს, ყველამ იცის ჩემი პოზიცია ამ საკითხთან დაკავშირებით და პოლიტიკური კომენტარისგან თავს შევიკავებ. ამის უფლება მე უკვე აღარ მაქვს. ამიტომ უკრაინის პროკურატურა ამის შესახებ განცხადებას გააკეთებს. ერთი შემიძლიათ გითხრათ, რომ უკრაინის გენპროკურორი ენდობა ქართველებსა და ქართულ ჯგუფს. ამ ადამიანმა გვერდში დაგვიყენა იმის გამო, რომ მივეხმაროთ, ეს სისტემა იყოს ისეთივე თანამედროვე და გამართული, როგორც საქართელოში შევძელით და იმაზე უკეთესი კიდევ. ამიტომ ეს ნამდვილად მისი პოზიციაა. რაც შეეხება მიხეილ სააკაშვილის და ადეიშვილის გადაცემას, ამაზე მასთან საუბარი არ მქონია“, - განაცხადა საყვარელიძემ.

შეგახსენებთ, საქართველოს მთავარმა პროკურატურამ უკრაინული მხარისგან ზურაბ ადეიშვილის ექსტრადირებაზე ოფიციალური უარი მიიღო. ამიტომ მოთხოვნა მეორედ გაიგზავნა. საქართველოს პროკურატურა ასევე მიხეილ სააკაშვილის ექსტრადირებას ითხოვს.