უკრაინის პრეზიდენტი, პეტრო პოროშენკო გუშინ არტემოვსკში იმყოფებოდა, სადაც დებალცევოდან ევაკუირებული მეომრები მოინახულა და რამდენიმე მათგანი „ბოევიკებთან“ ბრძოლაში გამოჩენილი გმირობისათვის დააჯილდოვა.

ანტიტერორისტული ოპერაციის ზონიდან დაბრუნების შემდეგ, უკრაინის პრეზიდენტმა თავდაცვისა და უშიშროების საბჭოს სხდომა მოიწვია, სადაც გაეროს დონბასში სამშვიდობო მისიის შეყვანის თხოვით მიმართა.

პოროშენკოს განცხადებით, დებალცევოდან უკრაინელი მეომრების გამოსვლისას დაიღუპა 6, ხოლო დაშავდა 100-მდე მებრძოლი.

მისი თქმით, დებალცევოს დატოვება წინასწარ დაგეგმილი და ორგანიზებული იყო და ჯარისკაცების ევაკუაცია პრაქტიკულად დასრულებია.

„ბოევიკების“ ლიდერის განცხადებით კი პრორუსული სეპარატისტები ქალაქზე სრულ კონტროლს ფლობენ. ჯერ კიდევ გუშინ, მათ დებალცევოს რკინიგზის სადგური დაიკავეს. „ბოევიკები“არტემოვსკისა და დებალცევოს დამაკავშირებელი გზის დაკავებასაც ცდილობენ.
მინსკის ხელშეკრულების ძალაში შესვლისა და ცეცხლის შეწყვეტის რეჟიმის ამოქმედების მიუხედავად, აღმოსავლეთ უკრაინაში საომარი მოქმედებები კვლავ მიმდინარეობს.