მეტროს თანამშრომლები გაფიცვას აპირებენ

საზოგადოება - 18:40, 28 Jan, 2013

5140

გარდა იმისა, რომ ეს სოლიდარობის აქცია იქნება, მათი თქმით, მსგავსი ვითარებაში მაშინაც შეიქმნა, როცა რამდენიმე თვის წინ ავტობუსების მძღოლები გაიფიცნენ, მაგრამ მაშინ ახალი ხელისუფლება ჩაერია და საკითხმა დროებით მიიძინა. მეტროს თანამშრომლები ღიად პოზიციის დაფიქსირებისგან თავს იკავებენ, მაგრამ ამბობენ, რომ მათი მთავარი მოტივაცია, ადამიანური ხელფასის ქონა და ზეგანაკვეთურის ანაზღაურებაა.
,,ნიუპოსტმა“ რამდენიმე მგზავრს ჰკითხა აზრი. მოსახლეობა მიიჩნევს, რომ მგზავრობა ქვეყანაში ძალიან ძვირია და ტარიფების საკითხი აუცილებლად უნდა გადაიხედოს. წინააღმდეგ შემთხვევაში ეს საქმე აქციები არ შეწყდება და თუ შეწყდება, მხოლოდ დროებით.
ნელი ვარდოსანიძე, რომელიც დიასახლისია, ამბობს, რომ შვილიშვილების მოსანახულებლად დღეში 2 ლარი სჭირდება, რომელიც პრაქტიკულად თვის მანძილზე მისი პენსიის ძირითად თანხას ახარჯინებს.
,,ძალიან ჭირს ტრანსპორტი ქალაქში, მითუმეტეს, როცა ახლა ე.წ. მარშუტკები გაიფიცნენ, მეორე დრეა, ამბობენ, რომ მეტროს თანამშრომლებიც აპირებენ გაფიცვას და ძალიან გართულდება გადაადგილება. ბოლოსდაბოლოს ხომ უნდა დარეგულირდეს ეს ტარიფები? ხალხი ისედაც როგორი გაჭირვებულია და დღეში 2 ლარის გადახდა არავის არ ახეირებს იმ კომპანიების გარდა, ვინც ამ საქმეს უწევენ ლობირებას“_ ამბობს ქალბატონი ნელი.
სტუდენტი გიორგი ბარათაშვილი კი მიიჩნევს, რომ მისთვის სტუდენტური ტარიფი დიდი შეღავათია, მაგრამ როცა ეჩქარება და ,,მარშუტკით“ მგზავრობა უხდება, ხშირად დღეში 5 ლარი სჭირდება, რაც სტუდენტისთვის ძალიან დიდი პრობლემაა, იძულებულია, მშობლებზე იყოს დამოკიდებული, რადგან ვერც მუშაობს და ყოველ დღე ლექციებზე სიარული უხდება.
ოფიციალურად გაფიცვის შესახებ ინფორმაცია ჯერ არ არსებობს, მაგრამ როგორც ამბობენ, კვამლი უცეცხლოდ არ ჩნდება..