გერმანიის, უკრაინისა და რუსეთის ლიდერებმა ცეცხლის შეწყვეტისა და დებალცევოს რაიონში არსებული დაძაბული ვითარება, სატელეფონო საუბრისას კიდევ ერთხელ განიხილეს. ამის შესახებ ინფორმაციას კრემლის პრესსამსახური ავრცელებს.

სამი ქვეყნის ლიდერმა სატელეფონო საუბრისას, ეუთო-ს მისიის მნიშვნელობაზეც ისაუბრა. საუბრის სხვა დეტალები უცნობია.

შეგახსენებთ, „ნორმანდიული ოთხეულის“ მიერ მიღწეული შეთანხმებით, აღმოსავლეთ უკრაინაში ცეცხლის შეწყვეტის რეჟიმი 15 თებერვალს ამოქმედდა. მიუხედავად მიღწეული შეთანხმებისა, დებალცევოში სამხედრო მოქმედებები არ წყდება. უკრაინის მთავრობის განაცხადებით, სანამ სეპარატისტები ცეცხლს არ შეწყვეტენ, უკრაინული მხარე დებალცევოდან სამხედრო ტექნიკას არ გაიყვანს.