უკრაინის პრემიერ-მინისტრის, არსენ იაცენუკის განცხადებით, უკრაინას იმის მყარი გარანტიები სჭირდება, რომ მინსკის შეთანხმების პირობები შესრულდება.

„პუტინის არცერთი სიტყვის არ მჯერა. ყოველთვის უნდა ვიყოთ მზად იმისთვის, რომ ის შეთანხმებას არ შეასრულებს, ვინაიდან ყოველთვის ასე იქცევა“- განაცხადა არსენი იაცენუკმა.

მისი თქმით, ახლა ყველაზე მნიშვნელოვანი დროა იმისთვის, რომ უკრაინამ დასავლეთისგან სამხედრო დახმარება მიიღოს, რადგან უკრაინაში მშვიდობა მაშინ იქნება, როცა ქვეყანა თავდაცვისუნარიანი გახდება.

„ახლა ყველაზე მეტად გვჭირდება სამხედრო დახმარება. უკრაინას იმის მყარი გარანტიები სჭირდება, რომ მინსკის შეთანხმების პირობები შესრულდება. მშვიდობის ყველაზე დიდი კი გარანტია იქნება ის, თუ უკრაინა ძლიერი და თავდაცვისუნარიანი სახელმწიფო გახდება “- განაცხადა უკრაინის პრემიერ-მინისტრმა.

მისივე თქმით, კიევმა შესაძლოა მოსკოვისგან რეპარაცია მოითხოვოს. საკომპენსაციო თანხა პრორუსული სეპარატისტების მიერ განხორციელებული საბრძოლო მოქმედებების შედეგად დაზარალებული დონბასის აღდგენას მოხმარდება. იაცენიუკის განცხადებით, უკრაინის ეკონომიკის განადგურება რუსეთის კისერზეა და ამისთვის მან პასუხი უნდა აგოს.