ეუთო-ს სადამკვირვებლო მისიის წარმომადგენლები აღმოსავლეთ უკრაინის ქალაქ დებალცევოში არ შეუშვეს.

მიუხედავად ცეცხლის შეწყვეტის რეჟიმის ამოქმედებისა, დებალცევოში საბრძოლო მოქმედებები ამ დრომდე მიმდინარეობს.

ეუთო-ს დამკვირვებლების განცხადებით, გუშინ სეპარატისტებმა ქალაქში შესვლის უფლება არ მისცეს.

„ბოევიკების“ თქმით, მათ დებალცევო ალყაში აქვთ მოქცეული და მთელს ტერიტორიას აკონტროლებენ.

დებალცევო, დონეცკსა და ლუგანსკის ოლქების საზღვარზე მდებარეობს და მნიშვნელოვან სარკინიგზო კვანძს წარმოადგენს.

ეუთო-ს დამკვირვებლების განცხადებით, ქალაქში შესვლას დღესაც შეეცდებიან.

შეგახსენებთ, აღმოსავლეთ უკრაინაში ცეცხლის შეწყვეტის რეჟიმი 15 თებერვალს ამოქმედდა. ამის მიუხედავად, „ბოევიკები“ საბრძოლო მოქმედებებს არ წყვეტენ.