სკოლის გამოსაშვები გამოცდები 4+4 მოდელით, ორ ეტაპად ჩატარდება

საზოგადოება - 12:56, 28 Jan, 2013

653

ზოგადსაგანმანათლებლო სკოლებში 2012-213 სასწავლო წლის სკოლის გამოსაშვები გამოცდების მოდელთან და ჩატარდების ვადებთან დაკავშირებით გამართულ ბრიფინგზე მინისტრის მოადგილემ ალუდა გოგლიჩიძემ განაცხადა.

"2012-2013 სასწავლო წლის სასკოლო გამოსაშვებ გამოცდებთან დაკავშირებით მოდელი 4+4 ამოქმედდება და გამოცდები 2 ეტაპად ჩატარდება. პირველი ეტაპი 2013 წლის 15 თებერვლიდან 1 მარტის ჩათვლით იმ 4 სასწავლო დისციპლინაში ჩატარდება, რომელიც მოსწავლეებს უკვე დასრულებული აქვთ - ესაა გეოგრაფია და საბუნებისმეტყველო დისციპლინები, ხოლო 2013 წლის 20-დან 29 მაისს ჩათვილით მეორე ეტაპი ჩატარდება. გამოცდის კონკრეტულ ფორმასა და მის ტიპს სკოლა ირჩევს, ეს მისი გადაწყვეტილებაა. ამასთან, გაზაფხულის ეტაპი არაა სავალდებულო ხასიათის. ეს უბრალოდ კონკრეტულ სკოლაში შესაძლოა, ჩატარდეს ან არ ჩატარდეს. ამის გაკეთების მოტივი არის ის, რომ მოგეხსენებათ, მომავალი წლიდან სისტემა მთლიანად გადადის ამ მოდელზე და ეს სამინისტროსთვის ერთგვარი გამოცდილების დაგროვების, პილოტირების ინსტრუმენტიც კი შეიძლება, გახდეს", - განაცხადა გოგლიჩიძემ.

გოგლიჩიძის თქმით, გამოცდის ჩაბარების უფლება ზოგადსაგანმანათლებლო დაწესებულების დამამთავრებელი კლასის მოსწავლეებს და იმ პირებს აქვთ, რომლებმაც სრული ზოგადი განათლების საშუალო საფეხურის დაძლევის მიუხედავად, შესაბამის წელს სრული ზოგადი განათლების დამადასტურებელი დოკუმენტი ვერ მოიპოვეს.

"პირი, რომელმაც სრული ზოგადი განათლების საშუალო საფეხურის დაძლევის მიუხედავად ვერ ან არ ჩააბარა გამოცდები, მხოლოდ იმ ზოგადსაგანმანათლებლო დაწესებულებაში რეგისტრირდება, რომელშიც სრული ზოგადი განათლების საშუალო საფეხური დაძლია. ასეთ პირს უფლება აქვს პირველ ეტაპზე ყველა (8) დამამთავრებელი გამოცდა ჩააბაროს. მოსწავლეებისა და ექსტერნების ინფორმირებასა და გამოცდებზე რეგისტრაციას სკოლა უზრუნველყოფს", - აღნიშნა გოგლიჩიძემ.