დაკავებამდე მან თვითონ დაასახელა ვინაობა და ხმამაღლა ითხოვდა შველას, თუმცა, ორ გამვლელ ქალბატონს, რომლებიც მობილურებით ცდილობდნენ ინციდენტის გადაღებას, პოლიციელებმა ტელეფონები ხელიდან გამოგლიჯეს. ბექა სულაბერიძის დედა, ნანა სულაბერიძე აცხადებს, რომ მისი შვილი ავადმყოფია და პოლიციის მხრიდან ფიზიკური ზეწოლა მისთვის ორმაგად აღმაშფოთებელია.

ბექა სულაბერიძის დედა და მეზობლები ასევე ამბობენ, რომ პოლიციის თანამშრომლებმა ბექას უბნელ თანატოლებზე და მოზრდილებზე ინფორმაციის შეგროვება დაავალეს, ხოლო მას შემდეგ, რაც ახალგაზრდამ უარი განაცხადა, ამ ფორმით იძიეს შური.

"საშინელებაა, რაც ხდება. ბიჭმა "ნასედკობაზე" უარი თქვა და ახლა მაღაზიიდან ლუდის მოპარვას აბრალებენ. რუსთაველზე მდებარე მაღაზიის მეპატრონემ, საიდანაც თითქოს ლუდი ბექამ მოიპარა, კაცურად განაცხადა, ამ ბიჭს საერთოდ, პირველად ვხედავო. "ნასედკობაზე" უარის შემდეგ აი, ასე დასაჯეს ბექა სულაბერიძე. ვინ იცის, კიდევ რას მოუგონებენ", - ამბობს დაკავებული ახალგაზრდის ერთ-ერთი მეზობელი, რომელმაც ვინაობის დასახელება არ ისურვა.

მომხდარ ფაქტთან დაკავშირებით შსს-სთან დაკავშირება ვერ ხერხდება, რადგან საზოგადოებასთან ურთიერთობის დეპარტამენტის ხელმძღვანელი ნინო გიორგობიანი ზარებს არ პასუხობს. ბექა სულაბირიძის დაკავების შესახებ ოფიციალური ცნობა არ არის გამოქვეყნებული შსს-ს ვებ-გვერდზე, შესაბამისად, დაუდგენელი რჩება, რაში ედება ბრალი დაკავებულ ახალგაზრდას.