ნაფიცმა მსაჯულებმა გამამტყუნებელი ვერდიქტი მიიღეს

სამართალი - 20:51, 10 Feb, 2015

2700

ნაფიც მსაჯულთა სასამართლომ გამატყუნებელი ვერდიქტი იოსებ ჭელიძისა და ელვარდი მიმინოშვილის განზრახ მკვლელობის ფაქტზე, ბრალდებულ ზურაბ გორგაძის მიმართ მიიღო.

საქალაქო სასამართლოს ინფორმაციით, გორგაძეს განზრახ მკვლელობასთან ერთად ბრალად ედებოდა ცეცხლსასროლი იარაღის (ბერეტას სისტემის) და საბრძოლო მასალის მართლსაწინააღმდეგო შეძენა, შენახვა, ტარება. ასევე, ცეცხლსასროლი იარაღის (თთ-ს სისტემის) და საბრძოლო მასალის მართლსაწინააღმდეგო ტარება.

ნაფიც მსაჯულთა გამამტყუნებელი ვერდიქტის საფუძველზე სასამართლომ სასჯელის დანიშვნის სხდომაზე გამამტყუნებელი განაჩენი დაადგინა.

საქალაქო სასამართლოს ინფორმაციით, ბრალდებული ცნობილ იქნა დამნაშავედ ცეცხლსასროლი იარაღის (TT-ს სისტემის) და საბრძოლო მასალის მართლსაწინააღმდეგო ტარებისათვის, ხოლო ცეცხლსასროლი იარაღის (ბერეტას სისტემის) და საბრძოლო მასალის მართლსაწინააღმდეგო შეძენა, შენახვა, ტარებისათვის ნაფიცმა მსაჯულებმა გამამართლებელი ვერდიქტი მიიღეს.

საქმე 2014 წლის 12 მაისს, ლისის ტბის დასახლებაში მიწის ნაკვეთის გაყიდვასთან დაკავშირებით მომხდარ უთანხმოებას ეხება , რომელსაც მხარეებს შორის ურთიერთშელაპარაკება და ცეცხლსასროლი იარაღის გამოყენება მოჰყვა. ბრალდებულმა რამდენიმე გასროლა განახორციელა. დაჭრილი ორი პირი მიღებული დაზიანებების შედეგად საავადმყოფოში გარდაიცვალა.

აღნიშნულ სისხლის სამართლის საქმეზე 17 სხდომა გაიმართა, დაიკითხა დაცვის 3 და ბრალდების 28 მოწმე, ასევე, თავად ბრალდებული, რომელმაც თავი დამნაშავედ არ სცნო წარდგენილ ბრალდებაში.

მხარეთა პოზიციების გათვალისწინებით, ნაფიც მსაჯულებს მონაწილეობა არ მიუღიათ სასჯელის დანიშვნის სხდომაში, რომელიც დღეს თბილისის საქალაქო სასამართლოში გაიმართა. სასამართლომ ზურაბ გორგაძეს სასჯელის სახედ და ზომად 14 წლით თავისუფლების აღკვეთა განუსაზღვრა.

განაჩენი გამამტყუნებელ ნაწილში ერთჯერადად, საკასაციო წესით, შეიძლება გასაჩივრდეს თბილისის სააპელაციო სასამართლოში, გამოცხადებიდან ერთი თვის ვადაში, თბილისის საქალაქო სასამართლოს მეშვეობით.