დაკავებულ მსაჯებს საპროცესო გარიგება გაუფორმდათ

სამართალი - 19:53, 10 Feb, 2015

714

პროკურატურამ კომერციული მოსყიდვის საქმეზე ბრალდებულ მსაჯებს საპროცესო შეთანხმება გაუფორმა.
ბრალდებულებს პატიმრობის ვადად 4 წლამდე თავისუფლების აღკვეთა აქვთ მისჯილი, თუმცა, ამ ვადიდან ნაწილი პირობით მსჯავრად ჩაეთვალათ.
ხუთ ბრალდებულს, თორნიკე გვანცელაძეს, ალექსანდრე გუნთაძეს, ზვიად ასკაროღლის, თეიმურაზ ხუჭუას, ირაკლი ურუშაძეს საპროცესო შეთანხმების თანახმად, რეალურ სასჯელად განესაზღვრათ, 9 თვით თავისუფლების აღკვეთა. დანარჩენი ჩაეთვალათ პირობით მსჯავრად. ასევე, დაეკისრათ 3 -3 ათას ლარიანი ჯარიმა და თანამდებობის დაკავების უფლება 2 წლის ვადით ჩამოერთვათ. რაც შეეხებათ, ასევე ბრალდებულებს ოთარ ხეცაძეს და მამუკა ურუშაძეს, როგორც პროკურორმა ზვიად ფხაკაძემ განაცხადა, მათ სასჯელაღსრულების დაწესებულებაში 1 წლის გატარება მოუწევთ. დანარჩენი სამი წელი კი, პირობით მსჯავრად ჩაითვლება. გარდა ამისა, ხეცაძეს დაეკისრა ჯარიმა 15 ათასი ლარის ოდენობით, ხოლო მამუკა ურუშაძეს - 10 ათასი ლარის ოდენობით. რაც შეეხება ბრალდებულ ონისე მოლოდინაშვილს, როგორც ორგანიზატორი ის დამნაშავედ სამ ეპიზოდში ცნეს. საბოლოოდ, მას რეალური სასჯელის ვადად 1 წელი და 2 თვე განესაზღვრა. დანარჩენი - პირობით მსჯავრი. ასევე, მას დაეკისრა ჯარიმა 2 ათასი ლარის ოდენობით და აეკრძალა თანამდებობის დაკავება 2 წლით.
პროკურორის თქმით, ჩხრეკის დროს ამოღებული თანხები მფლობელებს დაუბრუნდებათ. ხოლო რაც შეეხება ოპერატიულ სახსრებს, ის შინაგან საქმეთა სამინისტროს გადაეცემა. დაცვის მხარე სასამართლოს გადაწყვეტილებით კმაყოფილია და გასაჩივრებას აპირებს. შეგახსენებთ, რომ კომერციული მოსყიდვის ფაქტზე, 8 მსაჯი გასული წლის სექტემბერში დააკავეს. გამოძიების ინფორმაციით, დაკავებულები წინასწარ ურიგდებოდნენ მოქალაქეებს და გარკვეული თანხის სანაცვლოდ, საშუალებას აძლევდნენ, წინასწარ შეთანხმებული ჯარიმების რაოდენობის მიხედვით, ფსონით მოგება მიეღოთ.