მერაბიშვილმა ჟვანიას გარდაცვალების მიზეზი ექსპერტიზამდე იცოდა

სამართალი - 15:40, 10 Feb, 2015

8232

ჟვანიას საქმეზე ბრალდებულმა ექსპერტმა ლევან ჩაჩუამ საქალაქო სასამართლოს დღეს ჩვენება მისცა და აღნიშნა, რომ რამდენიმე წლის წინ, მას ექსპერტმა ლევან სამხარაულმა უთხრა, რომ მაშინდელმა შინაგან საქმეთა მინისტრმა ვანო მერაბიშვილმა ზურაბ ჟვანიას გარდაცვალების დღეს, უკვე დილის 7:00 საათზე ყველაფერი იცოდა.
როგორც სასამართლო პროცესზე ჩაჩუამ განაცხადა, 2005 წლის თებერვალში, მას შემდეგ რაც გვამების ექსპერტიზა ჩატარდა, ის იმყოფებოდა ლევან სამხარაულის კაბინეტში, სადაც ერთ-ერთი პოლიტიკოსი ტელევიზიით გამოდიოდა და აკრიტიკებდა ვანო მერაბიშვილს, თუ საიდან დაასკვნა მან ექსპერტიზის ჩატარებამდე, რომ რაულ უსუპოვი და ზურაბ ჟვანია ბუნებრივი აირით მოწამლის შედეგად გარდაიცვალნენ.

როგორც ჩაჩუამ დღეს განაცხადა, მას სამხარაულმა უთხრა, რომ დილის 7 საათზე მერაბიშვილმა ყველაფერი იცოდა. ამ საკითხის ირგვლივ ჩაჩუას უფრო კონკრეტულად პროცესზე აღარ უსაბრია.
როგორც ადვოკატმა ჟურნალისტებთან საუბრისას აღნიშნა, მედიამ და საზოგადეობამ ამის შემდეგ დასკვნები თავად უნდა გამოიტანოს.

ირკვევა, რომ გვამის ექსპერტიზა 8 საათის შემდეგ დაიწყო.

ლევან სამხარაული აღნიშნულ პერიოდში ექსპერტიზის ბიუროს ხელმძღვნელი იყო.