,,თიბისი ბანკი" განცხადებას ავრცელებს

საზოგადოება - 15:55, 26 Jan, 2013

860

,,აღნიშნული შენობა ცოტა ხნის წინ თვითნებურად დაიკავეს აფხაზეთიდან იძულებით გადაადგილებულმა პირებმა, რასთან დაკავშირებითაც თიბისი ბანკმა თავიდანვე აცნობა შესაბამის სტრუქტურებს და სთხოვა, შენობაში განთავსებული ადამიანების პრობლემებისადმი სათანადო ყურადღების დათმობა.

თიბისი ბანკი გაგებით ეკიდება შენობაში შემოჭრილი ადამიანების მძიმე მდგომარეობას, თუმცა იმის გამო, რომ უახლოეს მომავალში ადგილზე დაგეგმილია გარკვეული სარეკონსტრუქციო-სარემონტო სამუშაოების დაწყება, თავს ვალდებულად ვთვლით, წინასწარ ვაცნობოთ მათ ამის შესახებ. ცხადია, რომ რეკოსტრუქციის დაწყება მათ სერიოზულ დისკომფორტს შეუქმნის და, რაც მთავარია სამშენებლო პროცესმა შესაძლოა გარკვეული რისკები წარმოშვას შენობაში მყოფი ადამიანების უსაფრთხოებისთვის. სწორედ ამიტომ, ბანკმა წინასწარ მიაწოდა მათ ინფორმაცია დაგეგმილი სამუშაოების დაწყების შესახებ და სთხოვა შენობის გათავისუფლება.

იმედს გამოვთქვამთ, უახლოეს მომავალში შესაძლებელი გახდება აღნიშნულ შენობაში განთავსებული პირების პრობლემის მოგვარება, მათთვის ზემოხსენებული დისკომფორტის თავიდან აცილება და ბანკის მიერ დაგეგმილი სარეკონსტრუქციო პროექტის განხორციელება. "_ ნათქვამია განცხადებაში.