ექსპერტ ლევან ჩაჩუას თქმით, ზურაბ ჟვანიას და რაულ უსუპოვის გვამებს არანაირი გარეგანი დაიზანება არ აღენიშნებოდათ. ამის შესახებ ჩაჩუამ სასამართლო პროცესზე განაცხადა, სადაც დეტალურად გაიხსნება ჟვანიას გარდაცვალების დღეს განვითარებული მოვლენები.

მისი თქმით, ის ლევან სამხარაულის ზარმა გააღვიძა, რომელმაც შეატყობინა, რომ ზურაბ ჟვანია გარდაიცვალა და რესპუბლიკური საავადმყოფოს პროზექტურაში მისვლა სთხოვა.

„ადგილზე ჯერ ჟვანიას, შემდეგ კი იუსუპოვის გვამი მიასვენეს. დაახლოებით 30 კაცი იყო მორგში, პრემიერ-მინისტრის კოლეგები და ახლობლები. იქ მოვიდა ნინო ქადაგიძე, გვამს ვერ ვაშორებდით, ეფერებოდა მას და ტიროდა. როდესაც გავიყვანეთ ხალხი შემდეგ დავიწყეთ დათვალიერება“-განაცხადა ლევან ჩაჩუამ.

მისი თქმით, ექსპრემიერის დათვალიერება რამდენიმე საათი გრძელდებოდა.

„როგორც ჟვანიას, ისე იუსუპოვს კანზე გვამური მოვლენები აღენიშნებოდათ. ექსპერტიზის დათვალიერებამდე აუცილებელი იყო გვამების ზედაპირული დათვალიერება“, - განაცხადა ჩაჩუამ.

რაც შეეხება ჟვანიას ტუჩთან არსებულ დაზიანებას, ჩაჩუას განმარტებით, ეს მიიღება ბალზამირების შედეგად.

„რაც შეეხება იუსუპოვის ექსპერტიზას, იქ მარტო ვიყავი, რადგან ჟვანიას გვამის დათვალიერების შემდეგ მორგი ყველამ დატოვა. იუსუპოვის სხეულში ე.წ. CO 76%-ს შეადგენდა. პასუხისმგებელი ვარ ბოლომდე ჩემს სიმართლეში, გამოძიებამ მომცა დავალება და მე ეს პირნათლად პროფესიონალურად შევასრულე. მათ გვამებს არანაირი გარეგანი დაზიანებები არ ჰქონდათ, მე ამას სრული პასუხისმგებლობით ვამბობ“-განაცხადა ჩაჩუამ .