საეჭვო ტაქსი მკვლელობის ადგილზე და ახალი მოწმეები კიწმარიშვილის საქმეში

სამართალი - 21:34, 09 Feb, 2015

7466

უფლებადამცველი ნანა კაკაბაძე ეროსი კიწმარიშვილის საქმეზე დაკითხვას ელოდება. მისი თქმით, ჭავჭავაძის ქუჩაზე მომხდართან დაკავშირებით ახალი ინფორმაცია აქვს. კაკაბაძე ამბობს, რომ თვთმხილველებისაგან, ადგილზე მყოფი საეჭვო პირების შესახებ შეიტყო, რომლებიც შემთხვევის ადგილზე სამართალდამცველებსა და ჟურნალისტებზე ადრე ტაქსით მივიდნენ და იმ ავტოფარეხშიც ჩავიდნენ, სადაც კიწმარიშვილი საკუთარ მანქანაში გარდაცვლილი იპოვეს.

„ავტოფარეხთან გაჩერდა მანქანა ტაქსის ტრაფარეტით, იქიდან გადმოვიდა ერთი ადამიანი, გადმოსვლისთანავე მეორე ადამიანმა ტაქსის ტრაფარეტი მოხსნა და ავტოფარეხში ჩავიდა. იქიდან მალევე ამოსულა და უთქვამს, რომ ეროსი კიწმარიშვილმა თავი მოიკლა“, - განაცხადა კაკაბაძემ.

გარდაცვლილი ეროსი კიწმარიშვილის ძმა, ზურა კიმარიშვილი აცხადებს, რომ ეგრეთ წოდებული ტაქსის ეპიზოდის შესახებ ინფორმაციას არც გამომძიებლები ფლობენ. კიწმარიშვილის ძმა სხვა ახალ მოწმეებზე საუბრობს, რომლებიც მისი თქმით, საქმეში გამოჩნდნენ. ერთი მათგანი გამოძიებამ უკვე დაკითხა. ზურა კიწმარიშვილი მათ ვინაობას არ აკონკრეტებს, თუმცა ამბობს, რომ შესაძლოა ეს პირები კიწმარიშვილის გარდაცვალების საქმეში მთავარი მოწმეები გახდნენ.

„ესენი არიან ორი ადამიანი, რომელთან ერთმანეთთან კავშირი არ აქვთ, მაგრამ გამოძიებისთვის ეს ადამიანები არია საინტერესო“, - ამბობს ზურაბ კიწმარიშვილი.