ცეზარ ჩოჩელს ბრალი ორი მუხლით წაუყენეს

სამართალი - 11:16, 26 Jan, 2013

535

"მცხეთა-მთიანეთის ყოფილ გუბერნატორ ცეზარ ჩოჩელს სამართალდამცველებმა ბრალი 337-ე და 194-ე მუხლის მესამე ნაწილით გუშინ წაუყენეს. საგამოძიებო სამსახურის თანამშრომლებმა ჩოჩელი 24 იანვარს დააკავეს. გამოძიება მას სამეწარმეო საქმიანობაში უკანონო მონაწილეობას და უკანონო შემოსავლების ლეგალიზაციას ედავება. ცეზარ ჩოჩელს, როგორც საჯარო მოხელეს, კანონმდებლობით ეკრძალებოდა სამეწარმეო საქმიანობა და საწარმოს მართვაში მონაწილეობა. მიუხედავად აკრძალვისა, იგი ფაქტობრივად ხელმძღვანელობდა შპს "ნიუ ენერჯის", მფარველობას უწევდა და ხელს უწყობდა სახელმწიფო ბიუჯეტიდან დაფინანსებული პროექტების შესრულებასთან დაკავშირებული კონტრაქტების გაფორმებაში. აღნიშნული საქმიანობის სანაცვლოდ, ღებულობდა დიდი ოდენობით უკანონო შემოსავალს და ფულის გათეთრების გზით აძლევდა კანონიერ სახეს. 2009 წლის ნოემბერში შპს "ნიუ ენერჯის" ცეზარ ჩოჩელმა მოსთხოვა, რომ სხვადასხვა პროექტების განხორციელების შედეგად მიღებული შემოსავლები გადაერიცხა შპს "ბერტას" საბანკო ანგარიშზე, რომლის ერთ-ერთი დამფუძნებელიც მისი ძმა იაგო ჩოჩელი იყო, თუმცა ფაქტიურად ამ ფირმას მართავდა ცეზარ ჩოჩელი. "ნიუ ენერჯიმ" ჩოჩელის უკანონო მოთხოვნა დააკმაყოფილა და შპს "ბერტაში" ეტაპობრივად 5 360 000 ლარის ოდენობით თანხა გადარიცხა. 2010 წლის ზაფხულში ცეზარ ჩოჩელის მოთხოვნის საფუძველზე, შპს "ნიუ ენერჯიმ" ჩოგბურთის და კალათბურთის მოედნების მოსაწყობად, თურქეთიდან ჩამოიტანა 61 845 ლარის ღირებულების საჭირო ინვენტარი და თბილისში, სოფელ დიღომში, ცეზარ ჩოჩელის მეუღლის, სვეტლანა ჩოჩელის საცხოვრებელი სახლის ეზოში დაამონტაჟა. გამოძიების მიერ მტკიცებულებების შეფასებისა და საერთო ანალიზის საფუძველზე, ცეზარ ჩოჩელის უკანონოდ მიღებულმა შემოსავალმა 5 421 845 ლარი შეადგინა. უკანონო სამეწარმეო საქმიანობით მიღებული შემოსავლები მას არ აუსახავს საჯარო მოხელის ყოველწლიურ ქონებრივ დეკლარაციაში. საქმის გამოძიება გრძელდება", - ნათქვამია განცხადებაში.