fresh news-ზე გასული სიუჟეტის შემდეგ მარინა ღლონტი, რომელმაც რესტორან „ფაზისში“ მომხდარ ინციდენტზე ისაუბრა, სამეგრელო-ზემო სვანეთის საოლქო პროკურატურაში დაიბარეს.

ღლონტი საგამოძიებო უწყებაში ამ წუთებში იმყოფება. როგორც მან პროკურატურაში შესვლამდე განაცხადა, ის ვარაუდობს, რომ პასუხს მოსთხოვენ იმის გამო, რაც „ფაზისში“ მომხდარ ინციდენტზე თქვა.

მან კიდევ ერთხელ განმარტა, რომ ეკა ბესელიას შვილი რატი მილორავა საფინანსო პოლიციის უფროსს ეუბნეოდა, „როგორ ვერ ნახეთ სამი მოწმე, ვინც იტყოდა, რომ დავით სარსანიამ ტენდერებში გამარჯვებისთვის კომპანიებისგან ფული აიღოო“.

ღლონტმა ეკა ბესელიას წინასაარჩევნო შეხვედრა გაიხსენა ფოთის მოსახლეობასთან, სადაც ის ფოთის ყოფილ მერს დავით სარსანიას ეუბნება, რომ არჩევნების შემდეგ მას მიხედავდა.

როგორც ცნობილია მარინა ღლონტი ფოთის „ნაციონალური მოძრაობის“ წევრის დარეჯან ცქვიტარიას ნათესავია. ცქვიტარია ამბობს, რომ ღლონტის პროკურატურაში დაბარება მხოლოდ „ფრეშნიუსზე“ გასულ სიუჟეტს არ ეხება. მისი თქმით, ამის მიზეზი არის ის, რომ არსებობს ფაქტები, სადაც ჩანს, რომ ეკა ბესელიას სხვადასხვა ბიზნესში ფინანსური დაინტერესება აქვს. ცქვიტარია ფიქრობს, რომ მარინას ღლონტს იმის გამო სჯიან, რომ ბესელიას ფაქტზე საჯაროდ საუბარი მოინდომა.

fresh news-ზე გასულ სიუჟეტში რესტორან „ფაზისში“ მომხდარ ინციდენტზეა საუბარი.

სპეციალურ რეპორტაჟში საუბარია იმაზე, რომ რამდენიმე დღის წინ რესტორანში ეკა ბესელიას შვილი რატი მილორავა მაღალჩინოსან ძალოვანებს კონკრეტული ადამიანების დაკავებაზე ესაუბრებოდა.