გუშინ, კიევში უკრაინის, საფრანგეთისა და გერმანიის ლიდერების შეხვედრა გაიმართა.

მოლაპარაკებები დაახლოებით 4 საათის განმავლობაში მიმდინარეობდა.

შეხვედრის შემდეგ გამართულ პრეკონფერენციაზე, უკრაინის პრეზიდენტმა პეტრო პოროშენკომ განაცხადა, რომ "ცეცხლის შეწყვეტისა და ომის დასრულების იმედი გაუჩნდა."

„ანგელა მერკელსა და ფრანსუა ოლანდს უდიდეს მადლობას ვუხდი იმ ძალისხმევისთვის, რომელიც უკრაინაში მშვიდობის დამყარებისა და სიტუაციის დასტაბილურებისთვის იჩენენ. მინდა აღვნიშნო, რომ ევროკავშირი ერთიანობასა და სოლიდარობას გამოხატავს უკრაინის საკითხთან დაკავშირებით. ეს ჩვენთვის ძალიან მნიშნელოვანია“- განაცხადა პოროშენკომ.

საფრანგეთის პრეზიდენტი, ფრანსუა ოლანდი მხარეებს ცეცხლის შეწყვეტისა და მინსკის მოლაპარაკებებით გათვალისწინებული შეთანხმებების შესრულებისკენ მოუწოდებს.

„აღმოსავლეთ უკრაინის კონფლიქტი მხოლოდ მშვიდობიანი გზით უნდა მოგვარდეს. მხარეებს ცეცხლის შეწყვეტისკენ მოვუწოდებ. რუსეთმა უნდა შეასრულოს მინსკის მოლაპარაკებებით გათვალისწინებული შეთანხმებები და გაათავისუფლოს მძევლები“- აღნიშნა ოლანდმა.

საფრანგეთის პრეზიდენტმა პუტინს, უკრაინელი პილოტის ნადეჟდა სავჩენკოს გათავისუფლებისკენაც მოუწოდა.

შეგახსენებთ, უკრაინელი პილოტი 2013 წლის 17 ივნისს სეპარატისტებმა ტყვედ ჩაიგდეს და რუსეთის სპეცსამსახურებს გადასცეს. მას შემდეგ სავჩენკო პატიმრობაში იმყოფება.

ანგელა მერკელი და ფრანსუა ოლანდი დღეს მოსკოვში ჩავლენ და ვლადიმერ პუტინს შეხვდებიან.