უკრაინელი დეპუტატები მოკლული ღონღაძის საქმესთან დაკავშირებით პროკურატურას მიმართავენ

მსოფლიო - 19:22, 05 Feb, 2015

1771

უკრაინაში ფრაქცია „პეტრო პოროშენკოს ბლოკის“ ხუთმა დეპუტატმა უკრაინის გენერალურ პროკურორს მიმართვა გაუგზავნა, რომლითაც ჟურნალისტი გიორგი ღონღაძის მკვლელობაში ბრალდებული, შსს-ს ექს-გენერალი ალექსეი პუკაჩის სააპელაციო სასამართლო პროცესის საჯაროობას მოითხოვს.

ამის შესახებ პოლიტიკოსებმა დღეს გამართულ ბრიფინგზე ისაუბრეს.

მათი თქმით, ყოფილმა გენერალურმა პროკურომა, ვიქტორ პშონკამ ვიქტორ იანუკოვიჩის ინტერესების გათვალისწინებით, უკანონოდ დამალა დამნაშავეთა სია და საბრალდებო დასკვნა.

დეპუტატებმა განაცხადეს, რომ გამოძების მსვლელობისას მოპოვებულ მასალებს, პშონკამ საიდუმლო გრიფი დაადო.

„ყოფილმა გენერალურმა პროკურორმა თვითნებური და სამარცხვინო გადაწყვეტილება მიიღო. ჟურნალისტის მკვლელობის გამოძიებისას მოპოვებული მასალების რამდენიმე ტომს საიდუმლო გრიფი დაადო, მათ შორის იმ გაზეთების ნომრებსაც, რომლებშიც ამ შემთხვევაზე წერდნენ“- განაცხადეს პრეკონფერენციაზე.

დეპუტატები მოქმედ გენპროკურორს მიმართავენ და მას კანონიერებისა და სამართლიანობის აღდგენაში დახმარებისკენ მოუწოდებენ, „წინააღმდეგ შემთხვევაში გამოვა, რომ თქვენც იმ კრიმინალების თანამზრახველები ხართ, რომლებმაც ეს მკვლელობა ჩაიდინეს და გამოძიება გააყალბეს“- აღნიშნეს დეპუტატებმა.

დეპუტატები მოითხოვენ პუკაჩის სააპელაციო სასამართლოს სხდომა საჯარო გახდეს და მოეხსნას საქმეს საიდუმლო გრიფი, რადგან მასალები არანაირ სახელმწიფო საიდუმლოს არ მოიცავს.

შეგახსენებთ, რომ ჟურნალისტი გიორგი ღონღაძე კიევში 2000 წლის 16 სექტემბერს დაიკარგა. იმავე წლის ნოემბერში, უკრაინის დედაქალაქთან ახლოს, ტყეში იპოვეს თავმოკვეთილი გვამი, რომელიც ექსპერტთა დასკვნით, ღონღაძეს ეკუთვნოდა.

ამის შემდეგ, გამოქვეყნდა სახელმწიფო დაცვის ექს-მაიორ ნიკოლაი მელნიჩენკოს მიერ, სავარაუდოდ, მაშინდელი პრეზიდენტის ლეონიდ კუჩმას კაბინეტში გაკეთებული ჩანაწერი. ჩანაწერში კუჩმას მსგავსი ხმა იძლევა განკარგულებას „მოუარონ“ ჟურნალისტს.

შსს-ს ექს-გენერალმა, ალექსეი პუკაჩმა აღიარა, რომ ჟურნალისტი თავისი ხელით გაგუდა.

2013 წლის 29 იანვარს, კიევის პეჩერის რაიონის სასამართლომ ჟურნალისტ გიორგი ღონღაძის მკვლელობაში დამნაშავედ ცნო შსს-ს ექს-გენერალი ალექსეი პუკაჩი და სამუდამო პატიმრობა მიუსაჯა.