ყოფილი პოლიციელების გლდანის ციხეში გადაყვანას ადვოკატები ეწინააღმდეგებიან

სამართალი - 18:50, 04 Feb, 2015

2405

ე.წ. კორტების სპეცოპერაციის საქმეზე დაკავებული 11 პირის ადვოკატები მათი დაცვის ქვეშ მყოფების არა გლდანის, არამედ „მატროსოვის“ ციხეში გადაიყვანას მოითხოვენ

როგორც დაკავებული ხუთი სპეცრაზმელის ადვოკატმა დარეჯან გილაშვილმა დღეს გამართულ პრესკონფერენციაზე განაცხადა, დაცვის უფლების განხორციელების დროს მისთვის ცნობილი გახდა, რომ ყოფილი პოლიციელების გადაყვანა იგეგმება გლდანის მერვე საპყრობილეში და არ არის გამორიცხული, ადგილი ჰქონდეს პატიმრების მხრიდან ინციდენტებს.

„ჩემთვის ცნობილი გახდა, რომ ყოფილი პოლიციელების გლდანის მერვე საპყრობილეში გადაყვანისა და განთავსების დროს, შესაძლებელია, პატიმრების მხრიდან მათ მიმართ ადგილი ჰქონდეს ინციდენტებს, ვინაიდან თითოეულ მათგანს წლების განმავლობაში მონაწილეობა ჰქონდა მიღებული დანაშაულებრივი სამყაროს წინააღმდეგ ბრძოლაში, აქედან გამომდინარე მიმაჩნია და ჩემი, როგორც ადვოკატის თხოვნაა , რომ ისინი მოთავსებულ იქნენ ე.წ. მატროსოვის ციხეში“,- განაცხადა გილაშვილმა.

ამასთან, მისივე თქმით, ამ დროისთვის მისთვის უცნობია, თუ სად იმყოფება დაკავებული 11 პირი.

ე.წ. კორტების სპეცოპერაციის საქმეზე დაკავებულ 11 პირს საქალაქო სასამართლომ დღეს აღკვეთის ღონისძიების სახით პატიმრობა შეუფარდა. მეთორმეტე საქართველოში არ იმყოფება.