დეპუტატ გოგლა ჟვანიას ინფორმაციით, ზურაბ ჟვანიას გარდაცვალების საქმე უახლოეს პერიოდში გაიხსნება.

ამის შესახებ გოგლა ჟვანიამ ძმის საფლავზე ჟურნალისტებთან საუბრისას განაცხადა.

"პროკურატურა აკეთებს ყველაფერს რაც შესაძლებელია. მე უწყებასთან მუდმივ კონტაქტზე ვარ და მინდა გითხრათ, რომ საკმაოდ ბევრი მტკიცებულებაა მოგროვებული. უკვე თვალსაჩინო ხდება საზოგადოებისთვის დანაშაულის ჩამდენი მხარე. უკვე ირიბად თუ პირდაპირ იწყება აღიარება იმის, რომ ცხედრებზე დაზიანებები იყო და ცხედრების გადაადგილება მოხდა. ახლა ცდილობენ ეს, რაღაც ფანტასტიკურ ვერსიებში შეფუთონ. ეს, რა თქმა უნდა, გარემოებებს არ შეცვლის მითუმეტეს, რომ მტკიცებულებები ბევრია და არის წინაპირობა, რომ ეს ფანტასტიკური ვერსია გასკდეს საპნის ბუშტივით", - განაცხადა გოგლა ჟვანიამ.

ის ასევე ადასტურებს, რომ ზურაბ ჟვანიას ერთ-ერთი რეგიონში გარდაცვალების შესახებ ინფორმაცია მთავარ პროკურატურას აქვს.

„მსგავსი ინფორმაციები პროკურატურაში შესულია და ხდება მათი გადამოწმება", - განაცხადა გოგლა ჟვანიამ.

ზურაბ ჟვანიას გარდაცვალების ფაქტზე ექსპერტ ლევან ჩაჩუას პროცესის მიმდინარეობისას მოსამართლემ პატიმრის მიერ მისთვის გამოგზავნილი წერილი წაიკითხა, რომელშიც მსჯავრდებული ამტკიცებს, რომ ზურაბ ჟვანია თელავში მოკლეს. პატიმარი თეიმურაზ გვარაძე აცხადებს, რომ ის ჟვანიას და უსუპოვის მკვლელობის მოწმეა.

გვარაძის განცხადებით, მკვლელობა კახეთში, თელავის რაიონის ერთ-ერთ ოჯახში მოხდა. მისი თქმით, მას ვიდეოჩანაწერიც აქვს, რომელიც კბილაშვილს გაუგზავნა.