უსუპოვის გვამი ხელიდან გაგვივარდა, ტანსაცმელი ალბათ ამ მომენტში დაესვარა- მიხეილ ძაძამია

სამართალი - 19:41, 02 Feb, 2015

5729

ყოფილი პრემიერ-მინისტრის ზურაბ ჟვანიას საქმეზე ბრალდებული სასამართლო-სამედიცინო ექსპერტის ლევან ჩაჩუას ეპიზოდზე, საქალაქო სასამართლოში დაცვის მხარემ დღეს ზურაბ ჟვანიას დაცვის ცვლის უფროსი მიხეილ ძაძამია დაკითხა.

ძაძამიამ ჩვენების დროს დაადასტურა, რომ რაულ უსუპოვის ცხედარი მან და ჟვანიას დაცვის უფროსმა კობა ხარშილაძემ შემთხვევის ადგილიდან გაიტანეს, თუმცა მისივე თქმით, ცხედარი ბინაში უკან დააბრუნეს. ძაძამიას ინფორმაციით, მან ზურაბ ჟვანიას ცხედარზე მხოლოდ ტუჩის არეში მცირედი დაზიანება შენიშნა, რაც მისივე თქმით, ხელოვნური სუნთქვის შედეგი იყო.

„არანაირი გარეგნული დაზიანება არ ჰქონდა, გარდა მცირედი ნაჩხაპნისა ტუჩის არეში. შემდეგ გავიგე, რომ კობას ხელოვნური სუნთქვის ჩატარება უცდია და სწორედ ამის მიზეზი იყო ეს მცირედი დაზიანება.

სისხლის კვალიც არ ყოფილა ადგილზე. მე და კობამ გადავწყვიტეთ, სიტუაციიდან თავის გარიდების მიზნით, რაულ უსუპოვის ცხედარი ბინიდან გაგვეტანა. გამოვიტანეთ, მაგრამ შემდეგ გადავიფიქრეთ და მისი უკან დაბრუნება გადავწყვიტეთ. ერთ მომენტში გვამი ხელიდან გაგვივარდა კიდეც და უსუპოვს ტანსაცმელი ალბათ, სწორედ ამ მომენტში დაესვარა,“ - განაცხადა ხარშილაძემ.
რაც შეეხება იმას, რატომ არ იყო აქამდე ცნობილი ის გარემოება, რომ უსუპოვის ცხედარი ბინიდან გაიტანეს და შემდეგ ისევ შეიტანეს. როგორც ძაძამიას ადვოკატმა გელა ქენქაძემ აღნიშნა, აქამდე, აღნიშნული კითხვა არ დასმულა და შესაბამისად, ამ გარემოების შესახებ ცნობილი სწორედ ამიტომ არ იყო.